Dinge raak rof in ons sepies, maar ek kan in my bene voel dit is maar net die begin… Veral nou dat dit lyk asof die grootste TV-skurk een van die dae haar comeback gaan maak. Ek moes teen dié tyd geweet het dat selfs ’n psigiatriese kliniek nie ’n psigopaat soos Wengrid sal kan stop nie…
Intussen het Angie (Char Carrie) Ruiterbosch se eie aspoestertjie geword, noudat die arme weeskind uitgevind het dat sy eintlik die kind van ’n Skotse-heer is.
Sepies op ons radar die week is Arendsvlei, Suidooster en Diepe Waters.
Diepe Waters
Tussen Johan (Liam Bosman) in Diepe Waters en Saartjie (Hunter Plaatjies) in Arendsvlei is daar nou te veel jong mense wat dwelmverslaafdes is. Ek kan nie meer kyk nie. My hart het amper in net so baie stukke soos Johan se hart gebreek toe sy oupa hom verlede week onder die bus gegooi het. Maar hy het hom nie net onder die bus gegooi nie, hy het sommer vier keer oor hom gery. Ek het altyd geweet Gys (Justin Strydom) is ’n stuk gemors, maar om jou eie kleinseun so voor die media en gemeenskap te verneder, is iets anders. Selfs ek het nie gedink Gys kan só laag daal nie. Maar soos hy gesê het, bloed is nie altyd dikker as water nie. Dít bewys hy keer op keer.
Kyk Diepe Waters op Catch Up en DStv Online.
Arendsvlei
Dit is darem moeilik om goeie mense in Arendsvlei te vind. Elke keer as ’n nuwe gesin intrek, dink ek hier kom die mense wat weer die balans tussen goeie en slegte mense in Arendsvlei gaan herstel. Ongelukkig het daar lanklaas ’n onskuldige gesin sonder geraamtes in hul kas ingetrek. Ek het vir weke al die gevoel gekry dat Derrick (Travis Snyder) nie lekker is nie, ek kon net nie my vinger daarop plaas nie. Maar nou weet ek! Dié man is ’n siek mens en ek bid dat hy vir arme Simone (Dawn Fisher) gaan uitlos.
Ek hoop regtig ek is verkeerd, maar ek dink hy het meer as net sy werk in PE verloor. Ek het ’n gevoel dat bose dinge daar gebeur het en dat Derrick glad nie so onskuldig is soos wat hy lyk nie. Kyk vir Anthony (Terence Bridgett)! Hy het kamstig vir familie kom soek en nou vind ons uit dat Wengrid eintlik vir hom gestuur het. ’n Gedeelte van my kry vir Anthony jammer, maar hy kan ook nie vir homself opstaan as dit by Rachel (Kim Syster) kom nie. Hy is regtig haar lap dog en doen net wat sy sê. Ek hoop dat hy dié week sy voet gaan neersit.
Almal is so bang vir Wengrid, maar ek weet regtig nie hoe daai vrou nog soveel mag van binne die malhuis se mure kan hê nie. Ek het gedink hulle het haar toegesluit en die sleutels weggegooi. Die Cupido-familie gaan nooit teen Wengrid kan wen nie. Dit is altyd pay day vir iemand as sy eers betrokke raak.
Kyk Arendsvlei op DStv Online.
Suidooster
Ek moes my lag hou toe Lady Lillian (Michele Maxwell) haar doodskaam vir Angie se uitrusting by haar deftige verwelkomingspartytjie. Angie het meer soos ’n hip Disney-prinses gelyk, terwyl Lady Lillian eintlik met ’n statige dame wou spog. Haar reaksie het my herinner aan Julia Andrews se reaksie toe sy haar alledaagse kleinkind in ’n prinses in The Princess Diaries moes verander. Ongelukkig vir Lady Lillian het sy nie die fabulous stilis Paolo wat vir Angie oornag in ’n statige dame sal kan verander nie. Ek begin nou nog lag as ek aan Angie se uitrusting dink. Daar was net te veel pers vere en tulle. Terwyl Angie haar voete in die rykes se wêreld vind, hoop ek Bianca (Simone Biscombe) vind nié liefde in Dirk (Evan Hengst) se arms nie. Dié twee spandeer nou te veel tyd saam. Hoor my as ek sê: Hier kom groot moeilikheid.
Kyk Suidooster op DStv Online.
