Mooiweer en warm, met onder andere Beer Adriaanse en Carla Smith in die rolverdeling, is uit die pen van die bekroonde skrywer Paul C. Venter. Venter is bekend vir trefferreekse soos Arende, Konings en Vlug na Egipte.
Watkykjy skryf só oor die reeks in sy resensie: “In ’n poging om die dorp se Afrikaanse kerk se koffers aan te vul, stem enkellopende vrouepredikant, ds. Issie (Marisa Drummond) in om ’n kontrak te sluit met die plaaslike, selfaangstelde “markargitek”, Alex Kemp (Geon Nel) om ’n vlooimark op Saterdae op die kerkgronde te hou.
“Kortliks opgesom, dramatiseer hierdie klein dorpie-verhaal die ietwat saai lewens van die karakters wat amper almal vlooimarksmouse is. Die gebeure ontknoop teen die onheilspellende agtergrond van ’n dreigende ramp wat vir sewe soorte onsekerhede sorg. Die groot dam wat bokant die hoëveldse dorpie sit se walle dreig om te bars en die inwoners en al soos ’n bybelse vloed te verswelg.”
Mooiweer en warm saai Dinsdae om 20:00 op kykNET (DStv-kanaal 144) en DStv Online uit. Die reeks is ook op Catch Up beskikbaar.
