Die reeks is goud – eintlik mos vanselfsprekend synde die briljante Bob Odenkirk betrokke is. Odenkirk, bekend vir sy rol as Saul Goodman in beide Breaking Bad en dié se spin-off, Better Call Saul, vertolk die titelrol in Lucky Hank.
As Prof. William Henry “Hank” Devereaux, Jr. speel Odenkirk die hoof van die Engelse department by die (geweldige) onderbefondse Railton College in Pennsylvania. As ons vir Hank ontmoet is hy midde ’n midlife crisis wat dreig om sy lewe totaal en al te ontspoor.
Terselfdertyd begin sy vrou, Lily, vertolk deur Mireille Enos (Hanna, The Lie), die adjunkhoof van ’n plaaslike hoërskool, haar lewenskeuses bevraagteken.
Die reeks, ’n swart humor komedie-drama, is gegrond op Richard Russo se 1997-roman, Straight Man. Russo het al vertel dat die inspirasie vir Straight Man van sy eie ervarings van klasgee by kolleges.
Lucky Hank het ’n punt van 93% op Rotten Tomatoes met Salon se resensie wat lui: “Ja, Lucky Hank is suiwer Odenkirk, wat op sy beste is as hy gemiddelde ouens speel wat voel asof hulle van alle kante aangeval en tot hul uiterstes gedruk word.”
Vanaf Vrydag, 14 Julie 2023, om 20:00 op M-Net (DStv-kanaal 101). Ook op Catch Up beskikbaar.
