Die vonkelwyn het gevloei en die tafel was al te fyntjies gedek. Die finale uitdaging van Kokkedoor Vuur & Vlam se tweede seisoen was ’n uitsonderlike ervaring en die emosies het hoog geloop.
Die twee spanne wat uiteindelik in die finaal teen mekaar meegeding het was kinkelbraaier Lourens Engelbrecht (37), ’n vryskutsjef van Pretoria en sy onthoubraaier-spanmaat Johan de Villiers (30), die operasionele bestuurder van ’n familieplaas naby Durbanville, teenoor kinkelbraaier Lorianne Heyns (44), ’n professionele kok en haar onthoubraaier-spanmaat, Benjie Benjamin (39), ’n hoogspanningselektrisiën van Kimberley.
Meesterlik, kompeterend en kop-aan-kop is maar net ’n paar van die beskrywings waarmee
die twee beoordelaars, Bertus Basson en Kobus Burger, dié spanne se onderskeie disse toegedig het. Bertus sê dit was werklik uiters moeilik om ’n wenspan te kies, want die disse was
uitsonderlik naby aan mekaar. Maar net een span kan wen.
“Die land se beste Vuur & Vlam-span is . . . Lourens en Johan!” kondig Kobus die wenners
aan. Hulle is eers oorbluf, maar dan sink die waarheid in – en die trane en goue lintjies wat
vrygelaat is, kompeteer met mekaar vir aandag. Tussen alles deur skitter die Goue Haan op sy troontjie. Twee waardige wenners, twee waardige naaswenners!
“Volgende keer vat ons hom, pappa, volgende keer vat ons hom,” is Lorianne se belofte aan
Benjie.
Terloops het ’n gallery van ons gunsteling foto-oomblikke tydens die tweede uittog van Kokkedoor Vuur & Vlam saamgestel. Kyk saam met ons terug op ’n werklik besonderse TV-seisoen. (Lees ook ons onderhoud met die wenners.)
Die beoordelaars: Bertus Basson en Kobus Burger. Foto: Verskaf
Francois het beïndruk met sy innoverende gebruik van sodawater in sy skilferkors. Foto: Verskaf
- Kokkedoor Vuur & Vlam S2 is nou op Catch Up beskikbaar.
- Kyk ook solank die eerste seisoen op Showmax.
