Die gewilde kykNET-koswerklikheidsreeks Kokkedoor: Vuur & vlam is as ‘n finalis in die die Suid-Afrikaanse-restauranttoekennings se Beste Kosprogram-kategorie benoem.
Dit is vanjaar die derde agtereenvolgende jaar dat hierdie toekennings, wat in 25 verskillende kategorieë ingedeel is, plaasvind en dit speel ’n sleutelrol in Suid-Afrika se gasvryheidsbedryf.
Kokkedoor: Vuur & vlam, wat deur Homebrew Films vervaardig is, se tweede seisoen is in 2025 uitgesaai.
Die reeks is een van vyf weergawes van die Kokkedoor-familie, waarvan die oorspronklike reeks in 2012 vir die eerste keer voorgesit en aan die einde van 2025 het kykNET kykers met Kokkedoor: Son & see en bederf.
Nie net het die verskeie tegnieke, wat van gaarmaak oor vlamme tot binne-in die as ingesluit het, nuwe insigte gebring nie, maar daar was ook ’n goeie skeutjie geskiedenis en fassinerende internasionale tegnieke waaraan talle van die deelnemers én kykers vir die eerste keer blootgestel is.
“Ons is bevoorreg om die uitsonderlike talent wat Suid-Afrika se kulinêre industrie dryf, te erken,” het Sara Kensington, vennootskapsdirekteur van die toekennings gesê.
“Deur ons platform mik ons daarna om die kollig op individue en instellings wat die toekoms van die gasvryheidsbedryf vorm, te skyn terwyl Suid-Afrika as die toonaangewende bestemming vir kulinêre uitstekendheid geposisioneer word.”
Hierdie toekennings strek aansienlik wyer as net Suid-Afrika. Dit word gerugsteun deur die World Restaurant Awards Group wat in 1999 tot stand gebring en in die Verenigde Koninkryk gevestig is.
Die groep, wat in 15 lande operasioneel is, se portefeulje sluit die British Restaurant Awards, World Restaurant Awards, World Hotel & Restaurant Awards, Mauritius Restaurant Awards en die West Africa Restaurant Awards in.
Publieke deelname is integraal deel van die proses en alle kategorieë is oopgestel vir die verbruiker om vir hul gunsteling/e te stem. Dit beteken dat die verbruiker – hetsy lede van die publiek, gasvryheidsgeesdriftiges en diegene wat professioneel by die industrie betrokke is – op hierdie manier hul stem kan laat hoor.
Boonop kan lede van die publiek ook die verrigtinge bywoon.
Om te stem besoek https://southafricarestaurantawards.com.
Die toekennings vind op Maandag 25 Mei in Johannesburg plaas.
