Nes die veelbekroonde eerste seisoen van Koek, wat lof van kykers en resensente én ’n Internasionale Emmy-benoeming ontvang het, blyk ’n wilde wipwarit van aksie, geweld en bloedvergieting op hande te wees in die tweede seisoen.
Koek se eerste seisoen was ’n stroomtreffer op Showmax, maar vanaf 9 Junie 2026 het dié reeks ’n splinternuwe tuiste. Die nuwe seisoen is eksklusief beskikbaar op DStv Stream (binne die Showmax-afdeling), op DStv se Premium-, Compact Plus- en Compact-pakkette.
Cindy Swanepoel hervat haar rol as Christelle Smit, maar is beslis nie dieselfde Kaapstadse tuisblyma en huisvrou wat alles verloor het nadat sy van haar rondloperman, Adrian (Stian Bam), se ontrouheid uitgevind en by Koeksusters ingestrompel het nie.
Wat is die resep vir Koek S2?
Wanneer die storiedrade weer opgetel word, is Christelle in ’n stryd om haar lewe te herbou terwyl ’n lelike skeisaak aan die gang is. Haar drome om haar mediese loopbaan te hervat en as enkelma vir haar dogter te sorg, lê egter aan skerwe. Dít terwyl haar eks (grotendeels) ongeskonde weggestap het nadat Christelle sy nier vir wraak geoes het. Nou dagvaar hy ook vir toesig van hul dogter, Stella (Izebella Louw). Hy is vasbeslote om Christelle van alles te ontneem. Wanneer Adrian ’n skelm prokureur aanstel om die saak in sy guns te swaai, volg ’n reeks gebeure wat Christelle terug in die onderwêreld dwing.
Intussen leef ’n afgetrede Moekie ’n lewe van stille vernedering. Dié voormalige bendebaas, vertolk deur Sandra Prinsloo, blyk nou ’n brose bejaarde vrou te wees wat deur vreemdelinge “Ouma” genoem word en vir wie pensioenarisafslag gegee word sonder dat sy daarvoor gevra het. Maar wanneer Christelle weer om hulp aanklop, is die vet in die vuur. Moekie het duidelik nog nie haar aptyt vir luiperdpatrone, brandewyn en niere steel, verloor nie.
“Dit is so ’n eer om hierdie karakter te herbesoek en nog ’n seisoen te hê,” het Cindy destyds gesê toe daar aangekondig is dat die reeks hernu is. “Christelle nou? Sy is edgy, sy is gevaarlik, sy is rateltaai. Moenie met haar mors nie – sy is deur baie. Maar sy is ook kwesbaar. Wat sy in seisoen 1 gedoen het, is intens. Dit is nie iets wat ’n mens sommer net agter jou sit nie.”
En oor wat kykers van haar kan verwag? “Daar sal ook baie komiese elemente wees wat met die ernstige elemente vermeng. Dit is die soort storievertelling wat ek graag doen.”
Ontmoet nuwe, sluwe karakters
Seisoen 2 stel ook nuwe, ongure karakters bekend, waaronder Frank Opperman as Thinus “Tjoppie” Terreblanche – die mees gevreesde bendebaas in die Noordelike Voorstede wat sy motorkapingsindikaat met ’n ysterhand vanuit sy rolstoel regeer. Ten spyte van sy kwynende gesondheid weier Tjoppie volstrek om die leisels aan sy lamsakkige seun, Tiny (De Klerk Oelofse), of sy manipulerende sesde vrou, Veronika (Leandie du Randt), oor te gee.
Vir jare het Tjoppie se sindikaat en Moekie se ontkleeklub ’n moeilike vrede gehandhaaf wat beide hul grense – en soortvan mekaar – gerespekteer het. Maar wanneer hierdie twee misdaadryke weens ’n reuse-misverstand bots, dreig dit om ’n oorlog te ontketen wat die Tygerberg-heuwels bloedrooi sal kleur.
Ook in die rolverdeling is, onder andere, Ashley de Lange, Clayton Evertson, Jacques Bessenger, Llandi Beeslaar, Vinette Ebrahim, Beer Adriaanse, Amalia Uys, Loren Loubser, en Dann-Jacques Mouton.
Die span agter die skerms
In die tweede seisoen is Eva du Preez ’n nuwe toevoeging tot die span agter die skerms. Sy sluit aan as redigeerder én mede-regisseur by die Safta- en Silwerskermbekroonde reeksleier en draaiboekskrywer, Christiaan Olwagen (Kanarie, Recipes for Love & Murder), en die Safta- en Silwerskermbekroonde regisseur en kinematograaf Johannes Pieter Nel (Magda Louw, Die tragiese saak van Pamina Vermaak, Die brug). Eva het haar regiedebuut op Wyfie gemaak en is ook bekend vir haar redigering van reekse soos Niggies en Die Nuusmakers.
Koek, ’n Showmax Original, se eerste seisoen is uit vele oorde geloof. Só het Rozanne Els destyds in haar resensie van S1 geskryf: “Koek is ’n weerspieëling van grinterige realisme…Dis menslik. En daarom is dit ook snaaks – dikwels lag-uit-jou-maag-snaaks… Die reeks, neergepen deur die bekroonde kreatiewe skepper Christiaan Olwagen, het ’n haas onhaalbare ‘Heilige Drie-eenheid’ van televisie geskep: ’n rolverdeling met toneelspelers wat loopbaanbeste vertolkings gee; ’n teks wat toor; en ’n oorkoepelende visie wat dit regkry om selfs die kleinste details tot ’n volmaakte TV-tapisserie te verweef.”
Koek S2 première met twee episodes op Dinsdag 9 Junie. Daarna word een nuwe episode weekliks vrygestel. Die reeks sal op DStv Stream se Premium-, Compact Plus- en Compact-pakkette beskikbaar wees. DStv Stream is gratis vir alle intekenare, maar ook beskibaar as ’n losstaande stroomdiens.
