Elke maand bring ons vir jou ’n opsommende voorskou oor al die drama, smart en skandale waarna jy op kykNET&kie se Turkse telenovela, Dikker as water, wat na Afrikaans oorgeklank is, kan uitsien.
Hier is ’n voorsmakie van wat in Januarie op Dikker as water-kykers wag.
Donderdag 1 Januarie 2026
Abdullah is kwaad oor die bewering dat Ömer en Alev ’n verhouding het en belet sy gesin om weer daaroor te praat. Leman probeer selfdood pleeg toe sy besef dat Ömer finaal van haar skei.
Maandag 5 Januarie 2026
Doğa smeek Fatih om in hulle eie huis te gaan bly, maar hy weier. Metehan raak in ’n bakleiery betrokke by die skool en vertel vir Kıvılcım van sy ma se poging tot selfdood.
Dinsdag 6 Januarie 2026
Nilay agtervolg Nursema en sien haar by Umut en gaan vertel vir Pembe. Leman ontsnap uit die hospitaal en konfronteer vir Ömer en Kıvılcım voor albei families.
Woensdag 7 Januarie 2026
Kıvılcım en Ömer verklaar hul liefde in Abdullah se huis. Niemand het daarvan geweet nie en begin onmiddellik vir Kıvılcım verdink van dubbele standaarde.
Donderdag 8 Januarie 2026
Almal sukkel om die skoknuus oor die verhouding tussen Kıvılcım en Omer te verwerk. Nilay vertel vir Pembe dat Nursema vir haar lieg, en dat sy steeds skelmpies vir Umut ontmoet.
Maandag 12 Januarie 2026
Ömer en Kıvılcım doen skadebeheer ná die vorige aand se gebeure, en Nursema word swaar gestraf.
Dinsdag 13 Januarie 2026
Umut en Nursema wil wegloop. Haar familie vind dit uit, en reël dat sy dieselfde aand nog trou.
Woensdag 14 Januarie 2026
Doğa vra Alev dat hulle twee iets moet doen om Nursema te help. Pembe vat Nilay dokter toe nadat sy skielik naar en duiselig voel.
Donderdag 15 Januarie 2026
Nilay kondig haar swangerskap tydens ete aan. Alev werk aan ’n plan om Ibrahim te ontbloot as die rokjagter wat hy is.
Maandag 19 Januarie 2026
Alev en Metehan vra Ceylan om vir Ibrahim te verlei. Hulle hoop dat Ibrahim van Nursema sal skei sodat sy by Umut kan wees. Abdullah ondersoek die saak.
Dinsdag 20 Januarie 2026
Nilay kan dit eenvoudig nie weerstaan om die pot te roer sover dit Doğa betref nie. Alev moet noodgedwonge aanvaar haar plan vir Nursema gaan nie werk nie. Ömer nooi vir Doğa en Fatih vir ete.
Woensdag 21 Januarie 2026
Nursema se lot word amptelik bepaal en een van die meisies op Alper se lys kom maak amok by die skool.
Donderdag 22 Januarie 2026
Abdullah betrap Mustafa waar hy in die middenagure koek bak, tot Abdullah se ontsteltenis. Ömer vra vir Kıvılcım om te trou.
Maandag 26 Januarie 2026
’n Hartseer Nursema trou met Ibrahim en Alev vertroos vir Umut. In ’n poging om weg te kom van Ibrahim, dreig Nursema om by die venster uit te spring en dan stamp Ibrahim haar uit.
Dinsdag 27 Januarie 2026
Fatih sit die hotel in die mark in ’n poging om van Kayhan ontslae te raak. Saniye laat weet vir Pembe dat Nursema op wittebrood in Italië is. Sy word intussen wakker in die hospitaal.
Woensdag 28 Januarie 2026
Nursema word gyselaar gehou in ’n hospitaalbed nadat haar skoonmense se seun Ibrahim haar by ’n venster uitgestamp het. Die skoonmense sê vir Nursema se ouers dat sy piekfyn is, maar Doğa bevraagteken dit.
Donderdag 29 Januarie 2026
Doğa red vir Nursema uit die hospitaal uit en neem haar na Alev se woonstel toe. Pembe dink steeds Nursema is op wittebrood in Italië.
Dikker as water saai weekliks van Maandae tot Donderdae uit om 20:00 op kykNET&kie en DStv Stream (DStv-kanaal 145).
