Felicity deel ’n onthulling wat Charity en Arno skok, en Lettie se drome neem ’n onverwagse draai. Intussen begin Joanna se slinkse planne uitrafel, en Schalk se manipulasie dreig om alles te verwoes…
1
Joanna se onheilspellende planne
Gys se familie kan sien dat Joanna se greep op Gys versterk, en hulle is bekommerd. Veral wanneer Joanna en Gys besluit om saam weg te gaan. Sy besigheid, sy familie én selfs sy hart word op die proef gestel soos Joanna se invloed al verder strek.
2
Gys se gesondheid wankel
Gys se toestand neem ’n gevaarlike draai, en dis duidelik dat iets of iemand meer weet as wat hulle erken. Pam begin ook vrae vra en haar vermoedens oor Joanna se betrokkenheid by Gys se gesondheidstoestand stuur golwe van wantroue deur Boskruin.
3
Schalk slaan terug
Terwyl Schalk sy eie pad stap met ’n splinternuwe handelsmerk om met HeelAtleet mee te ding, is dit duidelik dat sy stryd met Leandri nog lank nie verby is nie. Maar is dit ambisie of wraak wat hom dryf?
4
Sam is terug
In die verlede het Sam groot moeilikheid met sy vuiste langs die swembad gemaak. Maar dit lyk asof romanse hierdie keer op hom wag wanneer sy verskyning vonke by die Swartmarlyne laat spat. Hanneli se hart is dalk op pad gevaarlike water in…
5
Arno en Karla se groot besluit
Ná Felicity se skoknuus, wil Karla hê dat Arno vir toetse moet gaan. Maar gaan sy hardkoppigheid hom weerhou om sekerheid te kry?
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Diepe Waters is ook op Catch Up beskikbaar.
