Skemergrond verwelkom ’n nuwe gesig – en dié gesig is een wat kykNET-kykers reeds goed ken.
Adrian Steyn vertolk die rol van die geheimsinnige Zander Conradie, en Adrian hou sy kaarte naby aan die bors wanneer hy oor dié karakter uitgevra word. “Hy’s ‘n boer,” sê hy. “En ’n boer maak ’n plan.”
Hy verklap wel dat Zander nie jou alledaagse plattelandse karakter is nie. Hy is terselfdertyd ’n boer én prokureur, ’n kombinasie wat Adrian “nogals interessant” noem, en beskryf Zander as passievol, dapper en vol integriteit.
Teenoor Zander staan Adrian se karakter in Die Toring, Ryan Peterson. Volgens Adrian het sy vertolking van Ryan heelwat meer navorsing geverg het. “Ryan was moeiliker om aan te pak omdat hy homself in ’n hoë risiko, hoë beloning-omgewing bevind wat ek moes leer ken.”
Bloeitydperk
Vir Adrian is dié tydperk een van die grootste seëninge van sy loopbaan: “Alhoewel die twee reekse nou gelyktydig uitsaai, het ek gelukkig reeds omtrent twee maande voor Skemergrond met Die Toring klaar gemaak,” vertel hy. “Anders sou dit rof gewees het. Ek ervaar hierdie hele tydperk niks anders as seëninge nie. Alle eer aan die Here dat ek nie net werk het nie, maar ook die geleentheid gekry het om twee uiteenlopende karakters kort ná mekaar aan te pak.”
Elke stel bring sy eie atmosfeer saam, en hy geniet dit om dié nuanses raak te sien. By Die Toring het die verskeidenheid buitelugopnames telkens ’n vars energie op die stel gebring en ’n besondere indruk op hom gelaat. By Skemergrond is dit weer ’n ander wêreld. “Elke produksie het sy eie uniekheid, maar wat ek die meeste geniet, is die mense met wie ek werk,” sê hy.
‘Ek onderskat nooit wat moontlik is nie’
Dit is ook nie die eerste keer dat Adrian terselfdertyd in twee reekse verskyn nie. Kykers onthou hom moontlik nog uit sy tyd op 7de Laan en Nikiwe, wat ook gelyktydig geskiet én uitgesaai is. Tog bly die ervaring vir hom besonders: “Ek onderskat nooit wat moontlik is nie,” sê hy. Kykers sal Adrian ook herken uit reekse soos Getroud met Rugby en Wyfie.
Tussen die harde werk deur was daar ook ligte oomblikke – soos toe Adrian sy 30ste verjaarsdag op die stel van Die Toring gevier het. “Alhoewel ek die hele dag gewerk het, het hulle dit baie spesiaal gemaak.”
Vir Adrian is die belangrikste dat kykers die stories geniet. “Geniet die shows en onthou… dis net ’n storie,” sê hy laggend.
Skemergrond saai weeksdae uit om 19:30 op kykNET & kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
