Die reeks is nou geen Judge Judy nie, maar ’n mens sukkel om die kanaal te verander wanneer die bure hul vuil wasgoed in die Hof vir Klein Eise met Omo probeer toegooi en adv. Suzie Gordon haar oë op skrefies trek.
Die funksie van Suid-Afrika se Hof vir Klein Eise is om geskille onder die waarde van R20 000 te besleg. Daar is geen prokureurs nie – die betrokke partye stel self hul saak, lê bewyse voor en kan selfs getuies roep. In plaas van ’n regter of landdros, weeg ’n arbiter die gegewe inligting op. In dié kykNET & Kie-reeks tree Gordon as die arbiter op, en al is die hofsaal ook ’n televisiestel in ’n ateljee, is dit werklike sake wat voorgelê word en Gordon se bevindinge is regsbindend.
Gordon, ’n voormalige speurder en forensiese kenner, het min geduld vir beledigings en leuens in haar televisiehof. By tye is sy amper soos ’n geirriteerde juffrou wat vir die hoeveelste keer vir die klas oor hul bedenklike verskonings vir hul onvoltooide huiswerk moet berispe.
Die Hof, “waar klein eise groot drama veroorsaak” is eksklusief aan kykNET & Kie op DStv en ook op DStv Catch Up beskikbaar.
