Hy het ’n glimlag wat talle mense se knieë lam maak, spiere wat bult en sy groot hart is dié van ’n boerseun van die Vrystaat. Maar ten spyte van trefferliedjies soos “Stop, wag, bly nog ’n bietjie”, “Trouvrou” en “Jy laat dit maklik lyk”, is die einste groot liefde waaroor hy so sing nog in die sanger Brendan Peyper se lewe. En dís hoekom hy Op my eish! se nuwe bachelor is.
“Ek het ingestem om deel van die program te wees omdat ek baie oopkop oor die lewe is en nie deure wil toemaak wat vir my oopgaan nie,” sê Brendan in ’n persverklaring. “ ’n Mens weet nooit wat die lewe vir jou inhou nie en wat vir jou bestem is nie.”
Die ideale vrou?
“Ek het nie noodwendig ’n prentjie in my gedagtes nie, want soms is dit die persoon waarvan jy dit die minste verwag wat jou die hardste van jou voete afslaan. Al wat ek kan sê, is dat ek van ’n vrou hou wat atleties gebou is en ’n gesonde leefstyl handhaaf,” sê hy.
Hy sien die meeste daarna uit “om die vroue te leer ken en te sien hoe hulle reageer en optree”.
Meer oor Brendan Peyper
Brendan, wat op 7 Augustus sy 27ste verjaardag vier, is in Bloemfontein gebore en het op vyf reeds begin kitaar speel. Sy debuutalbum, Stop, wag, bly nog ’n bietjie, is in 2015 vrygestel en daarna het ’n rits treffers gevolg. “Jy laat dit maklik lyk” en “Stop, wag, bly nog ’n bietjie” se musiekvideo is elk reeds meer as 6,8 miljoen keer op YouTube gekyk. Sy nuwe treffer, “Toer om die vloer”, is in agt maande al 3,4 miljoen keer gekyk.
Kinkels wag in derde seisoen
Die derde seisoen van Op my eish! word in September en Oktober vanjaar by van Brendan se gunstelingplekke verfilm. Die uitvoerende vervaardiger, Gideon Eksteen van Wakanda Media, sê kykers kan beslis ’n paar kinkels verwag. Daar is egter nie te veel aan die formaat getorring nie omdat dit so goed werk.
Wat is die grootste les wat die vervaardigers van Op my eish! met vorige seisoene geleer het?
“Hierdie is meer ’n reël as ’n les, maar moenie betrokke raak by die alleenloper se besluite nie,” sê Gideon. “Dit is bewys in die vorige twee seisoene. Die beste manier is om die proses natuurlik te laat vloei.”
Hy sê hulle hoop Brendan gaan liefde vind.
“Hy neem deel met ’n oop kop en ’n groot hart en is reg vir enige gebeurtenis.”
Om uit te vind hoe om in te skryf en wat die reëls en regulasies is, kliek hier.
Stroom die eerste seisoen van Op My Eish! op Showmax.
