In elke episode van Bou of breek werk Johan en Zanelle Dorfling, die eienaars van Country Home and Design in Jeffreysbaai, saam met hul kliënte om enigiets van woonhuise tot besighede in asemrowende plekke te omskep.
Johan, beter bekend as Pikkie, en Zanelle is al 20 jaar getroud en is amper teenpole van mekaar. Johan is ’n introvert; Zanelle ’n ekstrovert. Johan neem sy tyd met besluite; Zanelle doen voor sy dink. Johan is presies; Zanelle kleur maklik oor die lyne in, maar elkeen bring hulle eie unieke ondervinding, vaardigheid en kunstigheid na alles wat hulle aanpak.
Die vervaardiger van die reeks is die akteur Reynardt Hugo. Hy en sy produksiemaatskappy, StraatKatMedia, was ook verantwoordelik vir die reeks Net mens. Volgens hom is Bou of breek enig in sy soort onder plaaslike leefstylprogramme. “Ons verf nie net mure nie. Ons bou huise van die grond af op en maak bestaande plekke baie mooi. Dit gaan nie net oor fisieke restourasie nie, maar ook oor die herstel van die siel… (Dis die) eerste Suid-Afrikaanse huisopknap- en huisbouprogram van sy soort.”
Van die projekte wat in Bou of breek gesien gaan word, sluit die restourasie in van ’n huis in St. Francisbaai vir ’n familie wat Johannesburg vir die Oos-Kaap verruil het, ’n barbierwinkel in Stellenbosch en ’n huis op die Gamtoosrivier wat in gaste-akkommodasie omskep word.
Terloops het met Johan en Zanelle gesels.
Julle konsulteer met mense voordat julle ’n projek aanpak om seker te maak hulle wíl huis toe kom ná werk. Maar hoe gaan julle te werk as jy en Zanelle dink die projek moet dalk ’n ander rigting inslaan om dit juis meer verwelkomend vir die huismense te maak?
Johan: “Daar is ’n fyn lyn tussen om klante presies te gee wat hulle wil hê en om iets beter voor te stel. Ons lees mense vinnig en verstaan wat hullel regtig nodig het. Ons weet wanneer om ’n ander idee voor te stel en wanneer om eenvoudig net wense uit te voer. Uiteindelik is dit altyd die kliënt se besluit.”
Wat is die eerste vraag wat julle vir mense vra wanneer hulle julle nader om hul huis te help regruk?
Zanelle: “Hoe wil jy in die vertrek voel?”
Watter vertrekke “praat” gewoonlik eerste met julle?
Zanelle: “Wanneer ons ’n huis heeltemal opknap, is die kombuis vir my die belangrikste element in die ontwerp. Dit is die hart van die huis, en die res van die huis se styl bou ek daarom. Daarna is die hoofslaapkamer vir my prioriteit, want dit is waar jy rus en herlaai vir die volgende dag. Dit hang egter altyd af van hoe mense leef en waar hulle die meeste tyd spandeer.”
Wat was, tot op hede, die moeilikste taak wat julle met Country Home & Design moes afhandel?
Johan: “Sonder twyfel, hierdie show! Om soveel projekte binne ’n beperkte tyd af te handel was uitdagend. Ons is altyd reguit en oop met klante, so as iemand ongelukkig was, kon ons dit uitsorteer omdat daar van die begin af duidelike kommunikasie was.”
Julle het saam jul droomhuis ontwerp. Hoe het die proses verloop met dié dat julle twee sulke uiteenlopende persoonlikhede het?
Zanelle: “Ná soveel jare saam ken ons mekaar se sterk- en swakpunte goed. Ons vul mekaar eintlik perfek aan, maar dit kom met sy uitdagings. Ons het geleer om geduld en genade met mekaar te hê; daarsonder sou dit nie werk nie!”
Julle vertel dat Amerikaanse TV-werklikheidsprogramme rondom opknappings dinge vir julle laat kliek het. Uit watter program het julle die meeste inspirasie geput?
Zanelle: “Sonder twyfel, Fixer Upper! Ons vereenselwig met hul styl, asook hul familiewaardes en down-to-earth-persoonlikhede. Ek sien bietjie van myself in Chip Gaines en van Pikkie in Joanna Gaines.
Vertel van een van die grootste winskopies wat julle nog gevind het? En waar het dit opgeeïndig?
Zanelle: “Ek is mal oor ’n bargain! Een van my gunstelinge is Canvas & Print se aanlyn-aanbiedinge. Ek koop digitale foto’s op Etsy (ook winskopies!) en laat dit daar druk. Dit is ’n maklike en bekostigbare manier om ’n vertrek op te hef. My huis is vol daarvan, en ek gebruik dit gereeld in ons projekte. Met ’n hoë resolusie foto kan jy ’n canvas soos ’n kunswerk laat lyk, en dit verander ’n vertrek onmiddellik!”
Bou of breek begin op Sondag 6 April om 17:30 op kykNET en DStv Stream (DStv-kanaal 144). Episodes sal ook ná uitsending op Catch Up beskikbaar wees.
