Talle onverwagte kinkels het sepiekykers vasgenael voor die kassie gehou, maar veral dié vyf Binnelanders-storielyne het Suid-Afrika laat regop sit.
1
Delia en die Kosters
Binneland is ge-hack, en Delia (Odelle de Wet) is uit haar pos as mede-CEO verwyder en sy het ’n wrok teenoor die Kosters ontwikkel. Haar plan was om Binneland te sink, en van Amor (Laura-Lee Mostert), die groot skurk in die verhaal, ontslae te raak, maar ons het later uitgevind dat Johan Matthys Adler (Gustuv Gerdener) eintlik agter alles sit.
2
Wolf in skaapsklere
Johan Matthys Adler (Gustuv Gerdener) het sy opwagting gemaak. Nadat hy aandele in Binneland (én Ongevalle) bekom het, asook Conrad (Hykie Berg) se deel van die praktyk wat hy saam met Max Cloete gehad het, oorgekoop het, was sy plan om Binneland saam met Delia en Amor te sink. Amor is egter uitgewerk (deur Delia), en Johan het besef hy wil dalk nié vir Binneland sink nie, en eerder opbou. Hy en Ella (Marlee van der Merwe) het ook ’n verlede (hulle was destyds verloof), en hy koester steeds gevoelens vir haar.
3
Wipwarit vir Kate
Nicolette (Kate Roothman) was deel van die span wat ’n groot operasie met kunsmatige breinweefsel op Bronwyn (Kim Cloete) uitgevoer het. Maar, ’n nuwe karakter, Michael (Bobby van Jaarsveld) wou met alle mag dié weefsel in die hande kry. Hy het Nicolette met haar lewe gedreig, maar is uiteindelik uitgevang. In die proses het Nicolette op Danie (Arno Marais), die man wat vir die sekuriteit van die weefsel verantwoordelik was, verlief geraak.
4
Huis vol liefde
Louis (Germandt Geldenhuys) en Naomi (Je-ani Swiegelaar) se liefdevolle huis het nóg voller geword met Petro (Izette Blignaut), Joe (Roberto Kyle), Jess (Erin Patience), Thalia (Megan Troskie) en Nicolette wat saam onder hulle dak woon. Louis en Naomi wou egter ook baie graag ’n babatjie aanneem. Hulle is ge-scam, maar hulle het uiteindelik die pleegouers van ’n 12-jarige dogtertjie, Hannah (Rosebelle Clasen), geword. Hulle is nou in die proses om haar aan te neem.
5
Tertius en Tracy
Tertius (Reynardt Hugo) en Tracy (Melinda Viljoen) is deur ’n baie moeilike tyd! Sy was in ’n ernstige motorongeluk terwyl sy swanger was, sy het in ’n koma gegaan, en sy het die babatjie verloor. Toe sy wakker word, wou sy niks met Tertius te doen hê nie. Die groot vraag is nou: Gaan Tertius en Tracy se huwelik hierdie groot uitdaging oorleef?
Nog noemenswaardige gebeure wat in Binneland-kliniek vanjaar uitgespeel het:
- Henry (Francois Lensley) en Ella het mekaar weer gevind en ’n sterk paartjie geword. Intussen is Conrad (Hykie Berg) en Delia uitmekaar.
- Terwyl Tracy in die koma was, het Thalia Tonik bestuurd. Terselfdertyd het sy en Le Roux (Logan W. James) begin uitgaan, maar toe kom LJ (Julian Robinson) terug van Dubai af en sy besef daar is nog gevoelens. Sy en Le Roux het uiteindelik uitgemaak, en sy en LJ het mekaar weer gevind – maar hy is weer weg om die land saam met sy band, Garage Pie, vol te toer.
- Binneland Stereo raak al hoe groter met Bonnie (Antoinette Modise) aan die stuur van sake. Haar mede-verpleegsusters is Naledi (Millie Dintoe), Petro, en Jess.
- At (Hans Strydom) se vrou, Laetitia/Gretha (Rika Sennett) was baie siek met kanker. Sy sterf en At is hartgebroke.
Nuwe episodes van Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai. Daar is ook elke aand ’n herhaling van die episode om 23:30, asook Dinsdag tot Vrydag om 08:30.
Episodes van die vorige seisoen van Binnelanders word vanaf Maandag tot Vrydag om 22:00 op kykNET&kie. (DStv-kanaal 145) uitgesaai, met herhalings van dié episode om 01:00 die volgende dag. Daar is ook ’n omnibus van die week se episodes op ’n Saterdag om 10:30.
Seisoene 8-14 van Binnelanders is op Showmax beskikbaar. Die huidige seisoen is nie beskikbaar op die plaaslike weergawe van dié diens nie.
