Toe Binnelanders op 13 Oktober 2005 vir die eerste keer op kykNET uitgesaai is, het kykers voor die kassie ingeskuif vir wat toe nog ’n mediese dramareeks was en wat in die hartjie van Pretoria afgespeel het. Wie sou kon raai dat dit in een van Suid-Afrika se suksesvolste Afrikaanse sepies sou ontwikkel – ’n storie wat mediese nood, romanse, misdaad én tragedie in net die regte balans saamsmelt.
Hoewel Binnelanders begin het as ’n uurlange drama wat aanvanklik op beide M-Net en kykNET uitgesaai is, is dit halfpad deur die reeks se tweede seisoen in ’n sepie omskep. Daar was intussen nog ’n paar afdraaipaaie – soos toe ’n regspraktyk by die hospitaal-storielyn gevoeg en die titel na Binneland Sub Judice verander is – maar sedert 2011 word dit as ’n halfuurlange sepie op kykNET uitgesaai.
Van skokkende sterftes en ingewikkelde liefdesdriehoeke, tot skurke wat met moord kan wegkom, hier is van die mees onvergeetlike oomblikke, karakters, verhoudings en skandale wat Binnelanders oor die afgelope 20 jaar so besonders gemaak het.
1
At Koster geskiet!
At Koster (Hans Strydom) se skietvoorval het die dramatiese einde van Binnelanders as reeks en die begin van sy nuwe era as sepie ingelui. ’n Skokoomblik wat dit duidelik gemaak het dat hier nog meer bloed, spanning en drama kom.
2
Dié skokkende liefdesdriehoek stel die standaard
Stefanie Malherbe (Rolanda Marais), Franz Basson (Dawid Minnaar) en Gideon Basson (Neels van Jaarsveld) het vir Binnelanders een van sy grootste skandes gebring en dit was beslis nie die laaste liefdesdriehoek nie. As daar een ding is wat hierdie reeks goed kan doen, is dit ’n skokkende liefdesdriehoek!
3
Roelien, Chris en Jennifer
Kykers was verpletter toe Roelien van Deventer (Sarahann Doherty) gekeer het dat haar man Chris (Phillip C. Henn) met sy ware liefde, dr. Jennifer Adams (Sandi Schultz), trou. Hierdie storielyn het ook twee geliefde aktrises, Sandi Schultz en Nadia Valvekens, se sterre helder sien kyn. Hulle is tans te sien as frenemies Zelda en Sanet in die kykNET-telenovela Diepe Waters.
4
Pippa Venter: Van wegloopbruid tot ware liefde
Pippa (Nadia Valvekens) het Conrad (Hykie Berg) voor die kansel gelos, maar uiteindelik ware geluk by kapt. Ferdie Liebenberg (Dirk Stoltz) gevind. Ná 13 jaar het sy die sepie verlaat en kykers met trane en nostalgie agtergelaat.
5
At en Ivanka
Die verhouding tussen die magtige At Koster en die (veel, veel) jonger Ivanka Gouws (Leandie du Randt) was net so omstrede as wat dit onvergeetlik was. Ivanka bly steeds ’n gunsteling onder kykers, veral wanneer sy weer ’n draai kom maak.
6
At Koster se reis van skurk na held
Geen skurk in Binnelanders se geskiedenis het soveel invloed soos At nie. Hans Strydom is een van die laaste oorspronklike akteurs wat sedert die begin van Binnelanders se dae al op die program te sien is. Van manipulasie tot magspeletjies, hy was die man wat almal gevrees het. Maar uiteindelik het selfs At sy sagter kant gewys…
7
Cherilee Gouws en Ferdi du Toit – wreedheid in ’n wit jas
Nicola Hanekom se vertolking van Cherilee het vir koue rillings gesorg. Sy en Ferdi het Naomi (Je-ani Swiegelaar) wreed gemanipuleer en selfs haar eie dogter misbruik in ’n siek “kanker”-bedrogstorie.
8
Marissa teen Ella
Marlee van der Merwe se dubbelrol as die tweeling Marissa en Ella was ’n hoogtepunt. Marissa het haar kollegas vergiftig, haar seun gemartel en uiteindelik moes haar eie suster haar psigologiese teistering tot ’n einde bring. Suiwer Binnelanders-teater!
9
Riekie: Die moordenaar wat niemand verwag het nie
Riekie (Zandélle Meyer) het soos die onskuld self gelyk, totdat sy ontmasker is as ’n reeksmoordenaar wat haar pa se vriendin, Rita (Ilana Cilliers), wou frame vir die moorde. ’n Donker, onvergeetlike wending!
10
Delia en Andries – familie en siekte
Delia (Odelle de Wet) bly een van Binnelanders se mees intense en gemene karakters. Maar toe haar pa, Andries (André Odendaal), se dissosiatiewe identiteitsversteuring aan die lig kom en een van sy alterego’s haar kind ontvoer, het selfs geharde kykers haar begin jammer kry.
11
Toe Conrad homself “verloor” het
Ná ’n besering het Conrad (Hykie Berg) ’n totaal ander persoonlikheid ontwikkel. Vir weke lank het kykers die genadelose sakeman sag en sentimenteel sien raak, net om hom alles te sien verloor toe hy weer “homself” word. Tog het daar ’n bietjie van die nuwe Conrad oorgebly.
12
Louis en Naomi se orgaandrama
Louis (Germandt Geldenhuys) het in ’n orgaansmokkelnetwerk beland wat byna sy huwelik met Naomi vernietig het. Die skokkende waarheid dat haar nuwe hart van dr. Steve (Clint Brink) se vermoorde broer gekom het, het aanhangers laat sidder. Dit was beslis een van daardie storielyne wat kykers op die punt van hul stoele gehou het met een skok ná die ander. En aan die einde het Louis en Naomi – gelukkig! – mekaar weer gevind.
13
Die sperm-kinkel wat almal laat gasp het
’n Kliniekfout het gemaak dat Louis die biologiese pa van Delia se baba geword het – dít terwyl hy en Naomi self met vrugbaarheidsprobleme gesukkel het. Suiwer sepiegoud!
14
Tertius se twee babas, twee driehoeke en te veel drama
Van Daleen se babageheim tot Tracy se motorongeluk en koma, Tertius (Reynardt Hugo) het seker die meeste drama van almal beleef. Tog bly hy een van die gewildste dokters in Pretoria se bekendste kliniek. Twee keer het hy gedink hy het ’n dogter en twee keer was dit nie sy kind nie, maar dié van ’n Koster danksy ’n one night stand. Eina! Eers Daleen en toe Tracy (Melinda Viljoen).
15
Rian se “dood” en Pippa se hartseer
Rian (Erik Holm) en Pippa was die goue paartjie van Pretoria, totdat Rian sy eie dood geveins het. Toe hy weer verskyn, was sy reeds getroud met haar Kaptein. ’n Klassieke Binnelanders-tragedie. Moenie vergeet dat At ook sy dood moes fake nie. Dit is nog ’n opspraakwekkende Binnelanders-kinkel.
16
Die aardbewing
Die 2018-aardbewing is een van Binnelanders se indrukwekkendste produksie-oomblikke. En ook toe Louis besef het hy is werklik op Naomi verlief. ’n Kombinasie van spanning, liefde en asemrowende TV. Soos ’n toneel uit Chicago Fire.
17
Steve en Elana: Liefde, verlies en ’n laaste asem
Min storielyne het kykers so diep geraak soos Elana (Ilne Nienaber) en Steve (Clint Brink) s’n. Hul verhouding was vol warmte en eerlikheid en natuurlik ’n gesonde porsie drama – tot die dag wat alles weggeneem is. Elana se dood bly een van die hartseer-hoogtepunte in Binnelanders se geskiedenis.
18
Annelize Roux, koningin van chaos
Van blackmail en manipulasie tot gebroke harte, Annelize (Cindy Swanepoel) het dit alles gedoen. Sy is die definisie van ’n moderne sepie-skurk: stylvol, slim en soms net té gevaarlik vir liefde. Sy het seker die meeste verhoudings gehad en elke liewe een sonder langlopende sukses. As julle vergeet het, sy was met At getroud en sy was ook in verskeie verhoudings met (onder meer) Uys, Steve, Tertius, Jeremy, Eben, Rian én Conrad.
19
Okkie en Ilse
Vir elke skurk is daar mense met siel en diepte en dis Okkie (die ontslape akteur Ben Kruger) en Ilse Ferreira (Hannelie Warren). Hul liefde het jare lank vir balans gesorg, selfs toe dr. Sergio de Freitas (Emmanuel Castis) vir Okkie van moord verdink het.
20
Danny en Chanel, die liefdesverhaal wat nie sy gelukkige einde gekry het nie
Danny Jantjies (vertolk deur die ontslape akteur Bradley Olivier) en Chanel (Lindsey Abrahams) was die aan-en-af-paartjie wat almal met ’n gelukkige eindig wou sien. Bradley se skielike afsterwe in 2023 het sy karakter se laaste storielyn in ’n emosionele afskeid verander.
Hier’s op nog 20 jaar van hartseer, genesing en onvergeetlike drama by Binneland-kliniek!
Nuwe episodes van Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai. Daar is ook elke aand ’n herhaling van die episode om 23:30, asook Dinsdag tot Vrydag om 08:30.
Episodes van die vorige seisoen van Binnelanders word vanaf Maandag tot Vrydag om 22:00 op kykNET&kie. (DStv-kanaal 145) uitgesaai, met herhalings van dié episode om 01:00 die volgende dag. Daar is ook ’n omnibus van die week se episodes op ’n Saterdag om 10:30.
Seisoene 8-14 van Binnelanders is op Showmax beskikbaar. Die huidige seisoen is nie beskikbaar op die plaaslike weergawe van dié diens nie.
