Bad Behaviour is ’n Australiese reeks wat draai om Joanna Mackenzie (Jana McKinnon), ’n beursstudent aan ’n eksklusiewe wilderniskosskool, Silver Creek.
Daar ontmoet sy ’n groep tienermeisies, en terwyl daar vriendskappe gevorm word, is daar ook toetse vir lojaliteit, seksuele verkenning en daai allerverskriklike magstryd wat mos te gereeld onder ’n lot meisies ontstaan…
Die queen bee-boelie is Portia (Markella Kavenagh) en dan is daar die kwesbare musiekstudent, Alice (Yerin Ha). Die studente word oorwegend aan hul eie genade oorgelaat en tienerbrutaliteit vier hoogty in die digte boswêreld van Victoria.
Die storie ontvou in twee tydlyne, met terugflitse oor ’n tydperk van tien jaar wat die vertelling van ekstra dimensie voorsien.
In die hede is Alice nou ’n wêreldbekende tjellospeler en sy kom weer in kontak met Portia. Maar Alice besef dat sy ná tien jaar nog steeds net na Portia se aanvaarding soek.
Bad Behaviour is gegrond op Rebecca Starford se gelyknamige 2015-memoir. Sy het self eerstehandse ervaring opgedoen met afgryslike boelies op kosskool. Sy was 14 jaar oud toe sy vir ’n jaar lank na die skool in die bos gestuur is saam met 16 ander meisies.
Kitsfeit
Jana McKinnon (24) het eers laat in die oudisieproses opgeduik. Alison Telford het We Children From Bahnhof Zoo gekyk en besef sy is hul Joanna. Toevallig was Jana op besoek in Queensland en sy het haar oudisietoets aan die span gestuur.
Vanaf Vrydag, 21 Julie 2023, op Showmax.
