Menu terloops
In Sepies [10 Apr 2023]

Sepies: Leuens plaas lewens op die spel in ‘Diepe Waters’, ‘Arendsvlei’


Hierdie week raak dinge nog meer dramaties op ons skerms in die sepies ‘Diepe Waters’ en ‘Arendsvlei’.

Deur Tarren-Lee Habelgaarn
Sepies: Leuens plaas lewens op die spel in ‘Diepe Waters’, ‘Arendsvlei’

Daar is net een woord om die atmosfeer in verlede week se sepies op te som en dit is… cringe!

Ek was diep gespanne terwyl ek meeste van die tonele gekyk het. Meestal oor ek nie geweet het of ek moet kyk of wegkyk nie. Uiteindelik kon ek myself nie keer nie en het myself aan die tasbare drama en spanning oorgegee. Etlike akteurs het hulself oortref met onvergeetlike toneelspel. En daarmee saam hou die kinkels net nie op nie! Verlede week se aksiebelaaide drama was dalk intens, maar ook ’n heerlike bederf vir stoere sepieliefhebbers soos ek (en dalk jy?).

Diepe Waters

Verlede week het dinge regtig plofbaar op Diepe Waters geword. Die bom oor Rossouw (Altus Theart) en Anja (Reandi Grey) se verhouding het in ’n epiese en onvergeetlike episode in die Swarts-gesin se gesigte gebars. Dit kon nie meer cringe gewees het al het die skrywers hoe probeer nie. Die teks het my by tye na my asem laat snak. Ek het uit ongemak op my tande gebyt, want die woede en uitdrukkings op hul gesigte was net te veel. Dit het gevoel asof ek ’n moerse kettingbotsing dophou, terwyl ek eintlik moet wegkyk.

Die geheime het die Swarts-gesin soos vuishoue, die een na die ander, getref. Eers bars Karla (Daniélle Swanepoel) voor die predikant in woede uit en begin op haar pa en tannie skree oor hul verhouding. Die arme predikant was so skaam hy wou net wegkom. Sanet (Nadia Valvekens) het rooi gesien en het Anja amper te lyf gegaan. Die statige Sanet was so kwaad, sy was nie eens gepla met die feit dat almal haar shapewear kon sien nie. Sy was reg om te baklei en wou net straat toe met Anja! Jy kon sien hoe die lewe en kleur uit Meghan (Lea Vivier) en Jacques (Werner Coetser) se gesigte verdwyn het. Hulle was seker verlig dat dit nie hul geheim is nie… Maar dit het dalk wel gedien as ’n voorsmakie van wat kan gebeur as dit op die lappe kom.

Dit het ook nie gehelp dat hierdie geheim in die middel van die hernuwing van hul troubeloftes uitgekom het nie. Liewe genade. En toe kom Anja met die ander groot bom. Gys (Justin Strydom) het haar destyds gedwing om ’n aborsie te kry en die kind was sy eie kleinkind. In daardie oomblik kon jy vir Gys met ’n veer omtik. Die oomblik was priceless. Ek wag al vir maande hiervoor en dit was beslis die wag werd. Maar dit was nie al wat gebeur het nie. In ’n ware crescendo-oomblik, het Karla besluit sy het genoeg van hierdie sirkus gehad. Sy het haar eie lewe probeer neem en haar ma was te dronk om te kan help. Het Sanet hierdie keer groot genoeg geskrik om op te hou drink?

Kyk Diepe Waters op Catch Up en DStv Online.

Arendsvlei

Saartjie (Hunter Plaatjies) is toe nie so slim soos wat sy gedink het nie. Letterlik en figuurlik, want behalwe dat sy op haar klasse op universiteit druip, steek sy nie regtig haar dwelmprobleem goed weg nie. Maar kom ons hoop dit sal binnekort iets van die verlede wees.

Simone (Dawn Fisher) is wel baie slim en het vinnig ’n lokval vir die siek Derrick (Travis Snyder) gestel. Hy het sonder twyfel daarvoor geval en gaan nou hopelik vir jare in die tronk vrot. Maar in sepieland wurm mense hulself mos vinnig uit die tronk uit… Ek kan myself nie in Ivy (Octavia Meissenheimer) se skoene plaas nie. Ek sal so skaam wees as my man my so in die gemeenskap en by my werk verneder het. Ek weet nie hoe sy na hierdie een nog in in die Vlei sal kan bly nie, veral omdat sy nie vir Simone beskerm het nie.

Kyk Arendsvlei op DStv Online.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

kykNET se nuwe mini-dramareeks is ’n verhaal van verlies, vergifnis en hoop

Twee mans se paaie kruis in ’n ondersteuningsgroep ná die verlies van geliefdes. kykNET se 'Elke donker wolk' verken hoe ’n onverwagse vriendskap ruimte skep vir vergifnis, genesing en hoop.

Meer

Rubriek: Gaan griffel in Ouma se resepteboek! ‘Kokkedoor: Klassiek’ is terug! 

Ná ’n voorskou van die eerste episode laat 'Kokkedoor: Klassiek' vir Marteni Burger verlang na haar ouma se resepte én sien sy uit na nog skeppies nostalgie - met ’n knippie kombuisdrama en verrassende kinkels daarby.

Meer

Van die veld tot die kelder – kuier dié November saam met VIA

Van wildplase en wynkelders tot huise met karakter: VIA se November-aanbod beloof vars ontdekkings. Kuier saam met Shari Kennedy, Leandie du Randt, Frank Rautenbach en JP Quickelberge, en leer ken die mense, stories en plekke wat Suid-Afrika so besonders maak.

Meer

Chanél Muller oor ‘Sy, die meeue en die Heilige Gees’

"Enige persoon se geloofsreis is ’n baie persoonlike reis, en dit gebeur alles baie innerlik", sê Chanel Muller, die skrywer, regisseur en vervaardiger van die kykNET-reeks 'Sy, die meeue en die Heilige Gees'.

Meer
Sien alle opsies