Plan B het al die bestanddele nodig vir ’n trefferreeks: Die vroeë geliefde karakters gebore in die verbeelding van die internasionale topverkoper-skrywer Deon Meyer; ’n draaiboek deur die bekroonde Tertius Kapp; Jozua Malherbe (Devil’s Peak) in die regisseurstoel; en van die land se top-akteurs voor die kameras. Onder hulle tel Arnold Vosloo, wat al 33 jaar in Hollywood werk. En ná sy uitstekende spel in die rolprent Griekwastad, ook deur Kapp en Malherbe, en die Netflix-reeks Ludik, is hy weer in Afrikaans te sien.
Plan B vertel die verhaal van ’n man met ’n militêre agtergrond, Ivan Malan, en sy vennoot, Paul Schmidt, wat ’n bendebaas beroof en die meesterskilder Vermeer se Vlammemeisie – ter waarde van miljoene – steel. Intussen word Ragel Bergh deur die glyjakkals Joshua Lansky uit haar erfporsie geswendel. Alles lyk vir haar verlore, totdat ’n kunswaardeerder Ragel se paaie met dié van Ivan en Paul laat kruis. Al drie van hulle wil dieselfde ding hê: die Vlammemeisie.
Plan B, wat in en om Kaapstad verfilm is, bestaan uit vyf episodes.
Maar wie is wie in die reeks? Hier is ’n kort opsomming van die hoofkarakters en die akteurs wat in hulle vertolk.
1Amalia Uys as Ragel Bergh
Ragel is die eienaar van ’n boekwinkel. Maar sy word deur Joshua Lansky, ’n glyjakkals en seun van ’n bendebaas, uit haar erfporsie geswendel. Ragel het ’n liefde vir die fyner dinge in die lewe – goeie kos, boeke en musiek en as dit by kuns kom, verkies sy ouer, klassieke werk.
2Tim Theron as Ivan Malan
Ivan se humorsin is ’n skild vir sy donker verlede as ’n oud-lid van ’n geheime intelligensie-eenheid. Hy het moeilike kinderjare gehad en moes van kleintyd vir homself sorg. Nadat hy amper in die tronk beland het, is hy deur Paul Schmidt gewerf om vir die eenheid te kom werk. Sedert die ontbinding van die eenheid werk dié twee mans saam om gesteelde ware vir welgestelde kliënte op te spoor.
3Arnold Vosloo as Paul Schmidt
Paul span die kennis en talente wat hy by die intelligensie-eenheid geleer het later ten goede in. Hy is ’n wewenaar en sien Ivan as die seun wat hy nooit gehad het nie. Met ’n voorliefde vir letterkunde, kuns en teater, vind hy en Ragel gou gedeelde belangstellings.
4Armand Aucamp as Joshua Lansky
Joshua is die bedrieër wat Ragel uit haar erfporsie swendel. Hy is die seun van ’n aartsskelm – ’n pa wat nie net sy seun emosioneel geknak het nie, maar hom ook van sy ma gesteel het. Joshua het drome gehad om ’n kunstenaar te word, maar hy het nie die nodige talent gehad nie.
5Rolanda Marais as Margot Law
Margot en Joshua deel so nou en dan ’n bed, maar dit is nie die enigste ding wat hulle deel nie. Albei is ewe onseker van hulself. Margot is die middelpunt van enige party en pryk gereeld as sosiale vlinder op foto’s. Maar sy weet in haar hart dat dít als net voorgee is.
6André Jacobs as Zeev Lansky
Zeev is ’n bendebaas en Joshua se pa. Hy is ’n voormalige oorlogsmisdadiger en ’n man wat dink geld kan alles koop. Maar tog wil die wie’s-wie van die wêreld hom net nie as een van hulle aanvaar nie. Hy het gehoop Joshua gaan regte studeer en hom daarmee help om politieke invloed te kry, maar helaas is sy seun vir hom ’n reuse-teleurstelling.
7Sobantu Nqayi as Joe Moroko
Joe is ’n voormalige kollega van Ivan. Hy probeer ’n nuwe lewe lei en hoop sy verlede gaan hom nie inhaal nie. Joe is, nes Ivan, ’n ervare vegter en skut en het ’n gawe om verskillende persoonlikhede aan te neem. Hy is sjarmant en pas gemaklik in die wêreld van die superrykes in.
8Wanda Banda as Kate
Kate kan verby enige rekenaarsagteware se slot en grendel kom. Sy is beslis die slimste in die span – iets waaraan sy hulle graag herinner. Haar hoofdoel in die lewe is om geld te maak. Sy sien vriende as ’n gevaar vir haar veiligheid. Daarom is sy meeste van die tyd op haar eie in haar stylvolle woonstel.
9Dorette Potgieter as Hildegard
Hildegard is ’n kunsliefhebber wat as kunswaardeerder werk. Sy is stylvol, aantreklik en was al ’n paar keer getroud. Sy stel hoë standaarde vir alles en almal, en dit neem haar lank om mense in haar vertroue te neem.
En nog!
Ander spelers sluit in: Roberto Kyle, Devonecia Swartz, André Weideman, Anrich Herbst, Marguerite van Eeden en Dylan Williams.
Weeklikse episodes van Plan B vanaf Dinsdag, 26 Maart 2024, om 20:00 op kykNET (DStv-kanaal 144) en DStv Stream. Dit sal ook ná uitsending op Catch Up beskikbaar wees.
