As ’n sepie, verrig Suidooster ’n belangrike taak: dit bied troos-televisie én is ’n kulturele konstante, gepaardgaande met intieme familiesages én skerpsinnige sosiale kommentaar wat tred hou met die tyd.
Oor die jare het Ruiterbosch meer as net ’n fiktiewe woonbuurt geword – dit het ook ’n bekende en welkome tuiste vir Suidooster se kykers geword.
Ná meer as ’n dekade op die lug het Suidooster bewys dat volhoubaarheid nie van voorspelbaarheid afhanklik is nie. Die sepie se blywende krag lê in evolusie waar karakters groei, breek, herstel en natuurlik kykers telkemale verras.
Die nuwe seisoen gaan sonder enige twyfel dit waag om sleutelkarakters buite hul gemaksones te stoot en Ruiterbosch kan meer onvoorspelbaar as ooit tevore voel. Vir ’n sepie wat nou ’n tweede dekade betree, mag dit juis daardie onvoorspelbaarheid wees wat dit vars en relevant hou.
Met daardie nalatenskap in gedagte, hier is Terloops se seisoen 12-wenslys vir storielyne:
1
Angie neem beheer – maar hierdie mag dra gevolge . . .
Angie (Char Carrie) was nog altyd veerkragtig; nou wil ons haar formidabel sien. Seisoen 12 voel asof die oomblik aan haar moet behoort, ’n tyd waar sy ophou om bloot krisisse te bestuur (of te oorleef!) en waar sy begin om uitkomste te vorm. Strategies. Ten volle bewus van haar invloed. Maar mag kom selde sonder gevolge. Soos haar gesag groei, neem die druk ook toe – veral as die persoon naaste aan haar net so vinnig die gesagsleer bestyg.
2
Wade kry uiteindelik sy groot kans – en die balans skuif
Die lewe het Wade (Dean Smith) al behoorlik getoets en gepootjie. Ná talle storielyne van harde lesse en stille groei voel dit reg dat hy nou werklik sy beurt moet kry – hetsy deur ’n bevordering, ’n nuwe sakegeleentheid of ’n professionele oorwinning. ’n Deurbraak wat verander hoe ander hom sien, asook hoe hy homself sien. Maar sukses kan ook verhoudings herkalibreer . . .
3
JPD word tot in sy fondamente geskud
Nie chaos ter wille van drama nie, maar ’n strategiese skuif wat alliansies verander en kwesbaarhede blootlê. Berekende verraad, ’n belegger met ’n verskuilde agenda, ’n onverwagte oorname of ’n slegte sakebesluit deur Bridgette (Denise Newman) wat die toekoms van JPD onherroepbaar verander en die Jacobs-gesin van vooraf in ’n krisis dompel. Dit kan Bridgette weerloos (en gevaarlik) maak en haar eens hegte band met haar suster, Lee-Ann (Portia Joel), in skerwe laat spat.
4
Mymoena kies haarself
Min karakters het soveel emosionele gravitas gedra soos Mymoena (Jill Levenberg). Seisoen 12 bied haar die geleentheid vir iets stilweg radikaal: selfprioritisering. ’n Herontdekking van ’n doelwit wat nie in opoffering gewortel is nie, maar in selfwaarde.
5
’n Skurk wat Nazeem se eweknie is
Nazeem (Irvine van der Merwe) floreer wanneer mense hom onderskat. Wat as iemand opdaag wat hom weliswaar op sy baadjie takseer? ’n Teenstander net so skerpsinnig en geduldig, iemand wat hom intellektueel eerder as emosioneel uitdaag. ’n Stryd tussen twee skobbejakke met skokkende gevolge waar die inwoners van Ruiterbosch die slagoffers is.
6
’n Troue wat lojaliteit toets
Romanse bly deel van die sepie se DNS. Maar in Suidooster ontbloot sulke gebeure soms ook ware gevoelens of bybedoelings. ’n Troue wat ontrafel, sal volkome in pas wees met die reeks se aard. Die sepie se troues is immers uithaler-geleenthede en het kykers telkemale reeds verras. Dink maar net terug aan Tim (Marco Spaumer) en Nicci (Gerwin Simon) se amper-troue en dan praat ons nie eers van Bianca (Simone Biscombe) en Dirk (Evan Hengst) nie!
7
Kate se morele verval
Miskien die gewaagste moontlikheid: Kate (Annelisa Weiland) wat geleidelik in Nazeem se wentelbaan ingetrek word. Nie as ’n karikatuur van ’n skurk nie, maar as ’n innerlik verdeelde medepligtige. Invloed kan subtiel wees. Mag kan bedwelmend wees. Om te sien hoe sy een kompromie ná die ander regverdig, kan stilweg verwoestend – en uiters boeiend – wees. Haar seun Riaan (Daniel Coetzee) herken haar nie meer nie en hy en Gary (Craig Adriaanse) poog verwoed om haar van ondergang te red.
8
Mike en Amanda kom skiet wortel in Ruiterbosch
Dit is deur Suidooster bevestig dat Amanda (Lindie Strydom) en Mike (Anrich Herbst) permanent na die sepie gaan terugkeer. ’n Meer interessante wending sou wees indien Amanda ’n vreeslose nuwe hoofstuk betree, een waarin sy gewaagde besluite neem asook ’n herontdekking wat haar dogter, Frankie (Mienke Ehlers), verras en vir Mike ontstel. Dalk ’n verbode liefde – iemand heeltemal onverwags – wat haar storie herskryf en die gemeenskap laat gons.
9
’n Gesondheiduitdaging wat prioriteite herskryf
Suidooster hanteer kwesbaarheid nog altyd met sensitiwiteit. ’n Skielike krisis kan kykers herinner waarom hierdie karakters saak maak, want hul broosheid weerspieël ons eie. Dit kan moeilike gesprekke en emosionele wroegings afdwing.
10
’n Vriendskap of familiebande wat ineenstort
Romantiese verraad is voorspelbaar, maar vriendskaps- of familieverraad sny dieper. In ’n gemeenskap soos Ruiterbosch, waar geskiedenis mense soos ’n hegte familie verbind is, sal die ineenstorting van ’n kernvriendskap nie net tot twee betrokke individue beperk wees nie. Dit sal alliansies verander, magsbalanse verskuif en ’n emosionele nasleep hê wat lank ná die eerste konfrontasie voortduur.
11
’n Openbare geleentheid, ’n private afrekening
’n Feestelike gemeenskapsbyeenkoms wat skeefloop en voor die kykers se oë ontrafel, kan ook naelbytvermaak verskaf. Stel jou voor: glimlagte, toesprake en ’n noukeurig beplande geleentheid… Tot waar ’n voormalige inwoner wat ’n redelike bitter appeltjie te skil het, opdaag.
Ruiterbosch het immers geen tekort aan spoke uit die verlede nie. Tim (Marco Spaumer). Tristan (Arno Greeff). Suster Graaff (Marion Holm). Orpa (Marissa Drummond). Farah (Lee-Ann van Rooi). Enigeen van hulle wat terugkeer met wraaksugtige gedagtes sal tot chaos lei.
12
’n Tipiese Suidooster-‘cliffhanger’
’n Oomblik. ’n Deur wat onverwags oopgaan. ’n Openbaring middel van ’n bekgeveg. ’n Konfrontasie wat stop vóór daar ’n oplossing is. Die soort toneel wat lank ná die eindkrediete bly spook, die volgende dag die aktuele nuus haal en veral Ruitebosch en sy inwoners omdop.
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
