Soos die die laaste herfsblare deur die strate van Ruiterbosch, die fiktiewe Kaapse woonbuurt waar die kykNET-sepie Suidooster afspeel, ritsel, skets dit ook ’n onheilspellende prentjie oor wat vir die inwoners voorlê.
Dit begin veral duidelik raak dat hierdie ’n koue winter in Ruiterbosch gaan wees, een waartydens die een onvoorspelbare storm na die ander gaan losbars en heel moontlik verwoesting kan saai.
Daar’s ’n liefdesdriehoek wat op die randjie van ’n ineenstorting huiwer, skokonthullings, nuwe gesigte met verskuilde agendas en alliansies wat teen ’n duur prys kom. Dis maar net ’n tikkie van die drama wat jy gedurende Mei-maand in Suidooster kan verwag.
Wees veral op die uitkyk vir hierdie vier storielyne:
1
Angie én Zoë: Wie wen finaal Wade se hart?
Angie (Char Carrie) het ’n nare voorgevoel dat sake tussen haar en Wade (Dean Smith) nie heeltemal pluis is nie. En haar instink laat haar nie dié keer in die steek nie. Terwyl sy worstel om haar verhouding met Wade te beredder, sien Zoë (Lauren Joseph) ’n gulde geleentheid om Wade se hart terug te probeer wen.
Nes dit begin lyk of Zoë dalk die hef in die hand het, besluit Wade om ’n romantiese Mosambiek-wegbreek saam met Angie te reël. Dié poging gee vir Angie baie hoop, maar dinge draai nie heeltemal uit soos sy verwag nie.
Hoe lank kan Wade nog op twee stoele sit voordat alles in duie stort? ’n Skokkende nadraai verander alles in hierdie liefdesdriehoek.
2
Mike en Lee-Ann: Van konflik na flikflooi
Mike (Anrich Herbst) se aanstelling JPD skep onmiddellik spanning – veral met Lee-Ann (Portia Joel). Hy speel volgens sy eie reëls en op haar beurt het sy weer geen tyd vir sy nonsens nie.
Ná konstante konflik tussen die twee besluit Bridgette (Denise Newman) om hulle in te roep en daaroor voor stok te kry. Maar wat begin as twee hardekoejawels wat deurentyd koppe stamp, begin dit lyk asof dié twee begin om mekaar se geselskap te geniet.
Afsprake volg en gevoelens begin ontwikkel, maar Lee-Ann het ’n kwellende vermoede dat Mike dalk nog nie heeltemal van Amanda (Lindie Strydom) vergeet het nie. Is hy regtig oor sy eksvrou of is dit Lee-Ann wat bloot net ’n rede soek om dinge nie verder te vat nie?
3
Hugo: ’n Verskietende ster
Wanneer ’n Hollywood-superster in Ruiterbosch opdaag, is almal in rep en roer – veral Justin (Eden Clasens). Maar die glans van Hugo (David Chevers) se sjarme begin vinnig verdof nadat hardnekkige gerugte oor sy ontstellende gedrag opduik. Dan volg daar ’n onthullende potgooi en uiteindelik ernstige beskuldigings, en dit saamgeklits skets ’n donker prentjie van die man wat byna almal eers bewonder het.
Aanvanklik kies Justin Huge se kant, maar ook net tot die waarheid onmiskenbaar na vore kom. Nou moet hy saam met Frankie (Mienke Ehlers) en Gary (Craig Adriaanse) dit wat verbrou is, reg te probeer maak en vir Hugo in die openbaar ontbloot. Maar dit kom teen ’n groot prys vir Justin, ’n prys wat sy hele wêreld kan omkeer.
4
Ava: ’n Nuwe apteker (met ’n donker kant)
’n Geheimsinnige vrou, bekend as “Viper”, maak haar verskyning by Nazeem (Irvine van der Merwe) se poker-aand. En natuurlik is hy onmiddellik gefassineer deur die nuweling.
Wanneer hy ontdek sy is Ava (Simone Neethling), die nuwe apteker, raak dinge nóg meer ingewikkeld. Bedags professioneel, maar snags onvoorspelbaar.
Nazeem probeer haar ontrafel, maar sy is meer uitgeslape as hy en byna heeltyd een tree voor hom. Mymoena (Jill Levenberg) vermoed egter daar is ’n slang in die gras en sy waarsku vir Nazeem dat dit in ’n giftige situasie kan ontaard. En dié dobbelspel begin nou eers . . .
Suidooster word weeksdae om 18:00 op kykNET (DSTv-kanaal 144) en om 18:30 op kykNET & Kie (DSTv-kanaal 145) uitgesaai. Dit is ook beskikbaar op DStv Stream.
