Menu terloops
In Sepies [16 Sep 2026]

’n Pragtige rok, maar ’n gebroke hart: Frankie en Justin se rampspoedige ‘Suidooster’-troue


“Op haar troudag was Frankie se kop baie deurmekaar,” sê die aktrise Mienke Ehlers oor haar ‘Suidooster’-karakter.

Deur Redaksie
’n Pragtige rok, maar ’n gebroke hart: Frankie en Justin se rampspoedige ‘Suidooster’-troue

Die Suidooster-karakters Frankie en Justin se langverwagte troue Woensdagaand (16 September) het hartseer geëindig toe sy op die laaste nippertjie kop uitgetrek het. Vir Justin sou dit die begin van hul lewe saam wees, maar vir Frankie was dit die oomblik waarop sy haar hart, en nie haar verstand nie, moes volg.

Dié episode was ’n keerpunt in ’n verhouding wat van speelse flirtasie tot ernstige trouplanne gegroei het.

Iets aan die broei…

Dit het die afgelope tyd in dié kykNET-sepie duidelik geword dat daar gewis iets meer tussen Frankie (Mienke Ehlers) en Riaan (Daniel Coetzee) aan die broei is. Hoewel sy lief is vir Justin (Eden Classens), het haar aangetrokkenheid tot Riaan haar onsekerheid oor haar komende huwelik verdiep.

“Op haar troudag was Frankie se kop baie deurmekaar,” sê Mienke oor haar karakter. Volgens haar is Frankie se emosies oorheers deur “twyfel, vrees en angs”.

Justin het met heel ander verwagtinge by die kerk opgedaag.

Suidooster Justin en Frankie troue
Oomblikke voor Frankie haar troue gestop het. Foto’s: Verskaf

“Hy het haar beslis gesien as sy droomvrou met wie hy die res van sy lewe wou spandeer,” sê Eden oor die storielyn. Nadat Frankie aanvanklik gesê het sy is nie gereed vir die huwelik nie, het haar latere besluit om wel te trou, hom opgewonde gemaak. Hulle wou saam ’n toekoms bou.

Die beplanning en spoggerige trouklere het min van die naderende hartseer verklap.

Suidooster Justin en Frankie troue
“Hy het haar beslis gesien as sy droomvrou met wie hy die res van sy lewe wou spandeer,” sê Eden oor die storielyn.

Frankie het ’n noupassende, ivoorkleurige trourok deur die Kaapse mode-ontwerper Natalia Trisolino gedra, terwyl haar strooimeisies, Angie (Char Carrie) en Zoë (Lauren Joseph) se rokke, met ’n blomontwerp, van D’Vida Exclusives was.

Toe Ruiterbosch, die fiktiewe Kaapse woonbuurt waar die reeks afspeel, se pastoor, Siya (Gantane Kusch), gevra het of iemand beswaar het, het Frankie omgedraai en volgens Mienke was dit ’n bewys van hoe verdeeld haar karakter was: sy het gehoop iemand sou ingryp, maar terselfdertyd gevrees dat dit sou gebeur.

Uiteindelik was die besluit om die troue te stop haar eie.

Koeël deur die kerk

Suidooster
Justin het aanvanklik geglo hulle kon dinge uitpraat, maar vir Frankie was die koeël deur die kerk, en het sy besluit om eerlik met hom oor haar gevoelens te praat.

Volgens Eden was Justin se aanvanklike reaksie net algehele verwarring. Hul vriende en familie was daar, hulle sou hul lewe aan mekaar verbind, en skielik het alles tot stilstand geruk.

Justin het aanvanklik geglo hulle kon dinge uitpraat, maar vir Frankie was die koeël deur die kerk, en het sy besluit om eerlik met hom oor haar gevoelens te praat.

“Dit was ’n emosionele keerpunt en die oomblik van waarheid vir beide,” sê sy. “Vir Frankie was dit eerder ’n ontlading as ’n klimaks.”

Die paartjie se verlede het die tonele nog meer aangrypend gemaak.

“Hul verhouding het met tergery en gelag begin, en hulle het mekaar se sin vir humor regtig geniet,” sê sy. “Hulle was beslis beste vriende.”

Eden het die verhouding tussen Justin en Frankie se natuurlike evolusie waardeer. Die gedeelde vreugdes en uitdagings het die karakters laat groei en hul verbintenis geloofwaardig gemaak.

Vir hom was dit belangrik dat kykers hul eie ervarings in Justin se reaksies kon herken, veral hoe liefde vir iemand maklik daartoe kan bydra dat waarskuwingstekens misgekyk kan word.

“Die mense wat Suidooster kyk, is regte mense met werklike ervarings,” sê hy. “Jy wil hê hulle moet ’n verbintenis met ’n karakter of ’n situasie kan voel.”

Dit is ook nie die eerste keer dat ’n bruidegom in Suidooster voor die kansel gelaat word nie. 

In Augustus 2016, tien jaar gelede, was dit Nicci (Gerwen Simon) wat haar troue met Tim (Marco Spaumer) gestop het nadat sy besef het dat sy ware gevoelens vir Rhafiek (Irshaad Ally) het toe sy hom by die kerk sien instap. Sy en Rhafiek het daarna ’n verhouding aangeknoop, terwyl ’n woedende Tim op wraak uit was.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

kykNET se nuwe mini-dramareeks is ’n verhaal van verlies, vergifnis en hoop

Twee mans se paaie kruis in ’n ondersteuningsgroep ná die verlies van geliefdes. kykNET se 'Elke donker wolk' verken hoe ’n onverwagse vriendskap ruimte skep vir vergifnis, genesing en hoop.

Meer

Rubriek: Gaan griffel in Ouma se resepteboek! ‘Kokkedoor: Klassiek’ is terug! 

Ná ’n voorskou van die eerste episode laat 'Kokkedoor: Klassiek' vir Marteni Burger verlang na haar ouma se resepte én sien sy uit na nog skeppies nostalgie - met ’n knippie kombuisdrama en verrassende kinkels daarby.

Meer

Van die veld tot die kelder – kuier dié November saam met VIA

Van wildplase en wynkelders tot huise met karakter: VIA se November-aanbod beloof vars ontdekkings. Kuier saam met Shari Kennedy, Leandie du Randt, Frank Rautenbach en JP Quickelberge, en leer ken die mense, stories en plekke wat Suid-Afrika so besonders maak.

Meer

Chanél Muller oor ‘Sy, die meeue en die Heilige Gees’

"Enige persoon se geloofsreis is ’n baie persoonlike reis, en dit gebeur alles baie innerlik", sê Chanel Muller, die skrywer, regisseur en vervaardiger van die kykNET-reeks 'Sy, die meeue en die Heilige Gees'.

Meer
Sien alle opsies