Daar is goeie nuus vir Showmax-intekenare in Suid-Afrika – én dit kom boonop met ’n prysverlaging. Ná MultiChoice se onlangse aankondiging dat Showmax aan die einde van April 2026 sal sluit, het die uitsaaier nou ’n aanbod bekend gestel om kykers aan boord te hou.
Vanaf 1 Mei 2026 sal huidige Showmax-intekenare kwalifiseer vir een maand se gratis toegang tot die DStv Compact Stream-pakket.
Ná afloop van die gratis proeftydperk kan daardie intekenare teen R99 per maand die DStv Compact Stream-pakket vir die volgende 12 maande kyk. Dis ’n beduidende afslag op die huidige koste wat R299 per maand beloop.
123 kanale
Hierdie aanbod vorm deel van MultiChoice se strategie om sy stroomdienste te konsolideer. As deel daarvan word Showmax-inhoud na ’n toegewyde inhoudsafdeling op DStv Stream geskuif.
Die DStv Compact-pakket bied toegang tot 123 kanale, insluitend kykNET & kie. Dít beteken dat byvoorbeeld getroue Suidooster-aanhangers steeds hul gunsteling-sepie kan volg. Daar is ook ’n aantal SuperSport-kanale as deel van hierdie pakket wat ’n wye verskeidenheid sport-inhoud dek.
Intekenare behou dus nie net toegang tot sommige gewilde Showmax-reekse nie, maar ontsluit ook ’n veel breër vermaak-aanbod, met regstreekse TV, sport en op-aanvraag-inhoud.
Vir meer inligting, besoek die DStv-webwerf.
