Dinge begin nou warm raak in die Kokkedoor: Son & see-kombuis. Vir die eerste uitdaging moes die spanne meeding om te kyk wie die meeste pannekoeke in ’n kwartier kon opdis. Die deeg was klaar gemaak, dit was net ’n kwessie van bak. En buiten ’n geskenkbewys, was daar ook tien minute ekstra tyd vir die Goue Middeweg-uitdaging op die spel. Dié prys is uiteindelik gedeel deur twee spanne wat ewe veel pannekoeke gebak het: Andrew en Leoné, en Hanna en Dirk.
Die Goue Middeweg-uitdaging was een pot-, een pan- of een skottel-vakansiegereg en ryspoeding. Elkeen van die spanne moes ’n sak uit die Sixty60-motorfietsjoggie se houer gaan haal het – en dit sou bepaal of die vakansiegereg hoender of maalvleis sou wees. Die sak het ook ’n resep bevat wat as basis gebruik moes word: Pastoriehoender vir die hoender en frikadelle in tamatiesous vir die maalvleis.
Yvette en Fran, Andrew en Leoné en Caroline en Anél het maalvleis gekry en Frans en Una-Belle, Hanna en Dirk en Shireen en RJ het hoender gekry. Die spanne het 60 minute tyd gekry om die twee geregte, wat genoeg vir vier mense moes wees, te maak.
Hier is wat die spanne gemaak het:
Die top-2 spanne was Andrew en Leoné en Hanna en Dirk, met die ma-en-seun-span wat uiteindelik met die louere weggestap het.
Die onderste twee spanne was Frans en Una-Belle en Yvette en Fran, met Frans en Una-Belle wat ongelukkig hul voorskote moes ophang. Lees ook ons onderhoud met Frans en Una-Belle waarin hulle van dié leerskool vertel.
Vyf wenke uit die Kokkedoor-kombuis in dié episode
- Maak seker jou pan is warm wanneer jy pannekoek bak. As die pan nie warm genoeg is nie, gaan die pannekoek flop. – Herman Lensing, medebeoordelaar en aanbieder
- Ryspoeding word gewoonlik met ’n kort ryskorrel wat baie stysel bevat gemaak, maar Spekko se voorafgekookte (parboiled) rys, is ideaal wanneer jy dit vinniger wil maak. – Herman
- Om ryspoeding romerig te maak, gebruik bestanddele soos botter, room en miskien sjokolade gebruik, maar die balans is baie belangrik. – Herman
- Wanneer jy ’n eenskottelgereg maak, moet jy onthou die rys, vleis en groente het verskillende kooktemperature. – Yolani Abrahams, medebeoordelaar en aanbieder
- Wanneer jy hoender en rys onder ’n deeg wil sit soos Frans en Una-Belle het, moet jy eers jou hoender en rys gaar maak voor jy die deeg opsit. – Herman
Kokkedoor: Son & see saai Donderdae om 20:00 op kykNET en DStv Stream (DStv-kanaal 144) uit. Episodes is ook ná uitsending op Catch Up beskikbaar. Kyk ook Kokkedoor Vuur & vlam op Showmax.
