In die nuwe VIA-geselsprogram, Uit die slaapkamer, vat Dr. Elna Rudolph, ’n seksuoloog en mediese dokter, voor met gesprekke oor seks en seksuele gesondheid.
’n Klompie ander bekendes deel dan ook hul intieme ervarings met kykers. Dié paneel sluit onder andere vir Ouma weet mos se Adri Vivier in. Dan is daar ook die sangeres en aktrise Bianca le Grange, sowel as die akteur en aanbieder Neels van Jaarsveld.
Die reeks se besprekingspunte sluit in vrae van kykers af oor alles van advies vir beter sekslewe tot mediese kwale. Die onderwerpe sluit in menstruasie tydens seks, voorbehoeding vir tieners, seksspeelgoed vir vroue én mans, vaginale geboorte versus keisersnit… En nog báie meer.
Die eerste seisoen van Uit die slaapkamer word tans elke Woensdag om 21:00 op VIA (DStv-kanaal 147) uitgesaai. Dié weeklikse episodes, met Engelse onderskrifte, is op DStv Online en op die DStv-app beskikbaar, asook op Catch Up.
Die reeks volg op die sukses van Showmax se Sex in Afrikaans, wat vroeër vanjaar vrygestel is.
