Kuberboeliery, dwelmmisbruik, geweld en selfs selfmoordpogings – TikTok is geensins ’n blote pret-platform nie. Inteendeel – in die lokprent vir Showmax se nuutste ondersoekende dokumentêre prent, Tiek Tok Boem!, word daar lig gewerp op die lewens van die grootste Afrikaanse TikTok-persoonlikhede.
Dié TikTokkers sluit in: Christiaan Otto (Christiaan met 2 A’s) met nagenoeg 300 000 volgelinge; Amelda Claassen (Queen Amelda) met sowat 80 000 volgelinge; Leigh Pascheka Husselman (Leigh Pascheka) met meer as 65 000 volgelinge; Johnny van Rensburg (King Binlaken) met meer as 50 000 volgelinge en Teresa van der Bergh (Terrible Tess) met sowat 35 000 volgelinge.
Dié 90 minuut lange dokumentêr is deur Rian van Heerden en Provoco (wat ook die Safta-bekroonde Sex in Afrikaans geskep het) vervaardig en word Dinsdag, 18 Februarie 2025 op Showmax vrygestel.
‘Dit reën geld’
Volgens Van Heerden ondersoek Tiek Tok Boem! nie net hoe TikTok dié Suid-Afrikaners se lewens verander het nie, maar ook die geestelike en emosionele koste en impak van die internetroem wat daarmee gepaardgaan. “Ons het mense ontmoet wat duisende rande elke week verdien om regstreeks op TikTok te gaan. Dit reën geld daarbuite op sosiale media.”
Daarmee saam is die dokkie ook ’n “bloedstollende blik op die donker kant van roem in die TikTok-era,” voeg hy by. Van Heerden wou ook weet hoekom die TikTok-fenoneem juis in Afrikaanse kultuur aftrek kry, vertel Van Heerden. “In Suid-Afrika is dit meer van ’n Afrikaanse ding. Hoekom raak Afrikaanse mense betrokke by dié tipe gedrag – kuberboeliery, konflik aanblaas – en hoekom beloon ons hulle dan met geld en roem as hulle dit doen?”
Oor wat hom die meeste tydens die projek geskok het, sê Van Heerden: “Die absolute haat wat meeste van die omstrede TikTokkers in die kommentaar-afdeling ontvang. Dit het amper onmenslik gevoel.”
Buiten die TikTokkers word daar ook met die joernalis Marizka Coetzer (Devilsdorp), sosiale media smaakmaker Themba Robin, komediant en skrywer Melanie du Toit, en die sielkundige Sanam Naran oor die kulturele en psigologiese impak van internetroem gesels.
Vanaf Dinsdag, 18 Februarie 2025 op Showmax beskikbaar.
