Vandeesmaand in Skemergrond word ou wonde oopgekrap, maar daar is darem oomblikke van hoop. Ruan se soeke na antwoorde neem hom op ’n gevaarlike pad, terwyl Meryl se optrede die gemeenskap aan die gons het, en Christine weier om die stryd teen die Louws bes te gee.
1
Ruan se ondersoek neem ’n gevaarlike wending
In sy soeke na die waarheid vat Ruan die pad na Kaapstad, waar hy probeer om Vlek op te spoor. Wat begin met ’n sprankie hoop vir sy saak, verander vinnig in ’n nagmerrie wanneer dit duidelik word dat iemand hom dophou – en dat Vlek se invloed veel verder strek as wat enigiemand besef het. Teen die einde van die maand bereik die drama ’n hoogtepunt wanneer Lily se lewe in gevaar is en Ruan ’n gyselaarsituasie moet beredder.
2
Meryl veroorsaak chaos
Meryl se teenwoordigheid bly ’n bron van konflik. Sy stamp koppe met Erica, vervreem lojale kliënte by die Bistro, en haar nuwe rol as Wayne se assistent laat spanning in die gemeenskap opvlam. Maar net toe dit lyk of sy uiteindelik haar hand oorspeel het, draai haar geluk onverwags. En dit laat almal wonder: het Meryl dalk meer mag as wat sy voorgee?
3
Christine se stryd teen die Louws gaan oor na hoër rat
Ná ’n nuwe aanval wat Hazel diep ruk, word dit duidelik dat Christine se stryd teen die Louws maar net begin het. Al voel sy soms verslaan, kom sy telkens terug met nuwe planne. Sy is vasbeslote om dié stryd te wen, maak nie saak wie se lewens sy ontwrig nie.
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
