Ons bring vir jou die inside scoop oor die grootste storielyne wat hierdie week in sepieland uitspeel. Soos altyd – dié sepievoorskou is spoiler-free.
Diepe Waters
Gys (Justin Strydom) dink verniet dat hy die playmaker is. Jacques (Werner Coetser) is eensaam en gebroke en skrik nie meer vir sy pa se dreigemente nie. Ongelukkig vir Gys, is daar niks meer gevaarlik as ’n persoon wat niks oor het om te verloor nie.
Jacques se houding maak sy familie benoud, maar selfs sy ouboet se dreigemente is nie genoeg om hom te keer nie. Jacques kry ’n teken van Meghan (Lea Vivier) af en doen iets onvergeeflik wat die hele Swarts-familie gaan ruk.
Intussen is Anja (Reandi Grey) woedend nadat sy per ongeluk ingelig is oor nog ’n Swarts-geheim. Die geraamtes in die hul kas kon maarl uit ’n Mary Poppins-sak gekom het, want daar is regtig geen einde aan hierdie familie se leuens nie. Anja voel verraai deur Rossouw (Altus Theart) wat steeds geheime hou. Min weet sy dat daar nog groter bomme gaan bars.
Sanet (Nadia Valvekens) probeer haar bes om Dominee Ben (Eric Bouwer) te beïndruk en wanneer sy vir Karla (Daniélle Swanepoel) ’n guns vra, kry Karla die verkeerde indruk.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Binnelanders
Tertius (Reynardt Hugo) sukkel om Annelize (Cindy Swanepoel) aan die lewe te hou, terwyl ’n swanger Tracy (Melinda Brink) haar bekommer by die huis.
Hul lewe mag dalk in gevaar wees, maar daar is niks soos ’n lewensgevaarlike tragedie om jou perspektief te gee nie. Tertius maak uiteindelik ’n besluit oor sy toekoms met Tracy, maar wat beteken dit?
Delia (Odelle de Wet) is vasbeslote om vir Amalia ’n boetie of sussie te gee, maar trap op ’n hele paar tone wanneer dit by haar besluite kom. Steve (Clint Brink) sukkel met die idee van pa-word en bevraagteken sy toekoms met Delia.
Louis (Germandt Geldenhuys) en Naomi (Je-ani Swiegelaar) word weer in ’n onmoontlike situasie geplaas, maar sal die geskiedenis hom herhaal of sal hulle hierdie keer anders besluit?
Febé (Claudia Jones) en Karen (Luandri Reynders) se verhouding bereik ’n breekpunt en dinge word gesê wat hulle nie kan terugvat nie.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
Suidooster
Nazeem (Irvine van der Merwe) raak bekommerd oor sy inside man nadat Gary (Craig Adriaanse) ’n groot indruk op die JPD-span maak, wat al hoe meer van hom begin hou.
Lee-Ann (Portia Joel) probeer hard om die JPD-span te oortuig om hul bande met Alex (Duane Williams) te breek, maar ons almal weet dit gaan oor meer as net besigheid.
Ty (Maurice Paige) word weer agterdogtig oor Lee-Ann en Alex se verhouding. Hierdie keer is dit dalk met goeie rede!
Veroné (Zandélle Meyer) word verblind deur haar gevoelens vir Justin (Eden Classens) en neem besluite wat almal verbaas.
Kaashifa (Jawaahier Petersen) en Mymoena (Jill Levenberg) sukkel om Rhafiek (Irshaad Ally) te troos. Ná die voorval in die grot, weet Rhafiek nie meer of hy moet aanhou met Atlantic Adrenaline nie.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
