Hier is waarna jy hierdie week (4 tot 8 November) op Binnelanders, Suidooster, Diepe Waters en Skemergrond kan uitsien.
Diepe Waters
Sanet (Nadia Valvekens) is uit op borgtog, maar in ’n verrassende wending word daar iets in haar motor gevind wat haar hele saak op sy kop draai. Sanet het heel kalmer as ek gereageer toe sy twee en twee bymekaar begin sit. Ai, almal dink altyd Sanet het die kat aan die stert beet, maar dié vrou se intuïsie is selde verkeerd.
Ongelukkig kan dieselfde nie gesê word van haar sussie, Anja (Reandi Grey), nie. Anja was nog altyd te sag en vertrou mense te maklik. Dit is juis daarom dat sy haarself in hierdie ongemaklike situasie met René (Marijke Coetser) bevind. Ek was net so nuuskierig soos Zelda (Sandi Schultz) toe René laat val dat sy vir Anja van ’n vorige tydperk in haar lewe ken. Daai gesprek was nogal interessant en nou wonder ek of sy ook in Boskruin is vir wraak.
Dit was ’n hartroerende oomblik toe Lettie (Stephanie Baartman) sien wat haar Boskruin-familie vir haar gedoen het. Ek het self sommer ’n traan gestort.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Skemergrond
Patty (Gretchen Ramsden) beter haar kamerdeur sluit en met iets in haar sak rondloop, want hoor wat ek vandag sê: as sy nie wakker pies eet nie, is sy een van die dae nie langer met ons nie. Sy is lekker naïef en is altyd op die verkeerde spoor.
Hazel (Carmen Maarman) is nou nie die wêreld se maklikste housemate nie, maar agter haar harde persoonlikheid is ’n brose vrou. Ek voel nogal vir haar en ek weet nie of Ronnie (Mario Haupt) dit in hom het om sy huwelik te red nie.
Maar ek het glad lekker gekry toe Christine (Devonecia Swartz) ’n proeseltjie van haar eie medisyne gekry het. Iemand moes lankal hierdie vrou in haar plek sit.
Louis (William Adams) is op breekpunt en lyk asof hy wil bars. Hy en Amber (Talia Davis) se verhouding neem ’n ongemaklike draai hierdie week en ek weet nie of ek heeltemal met Lily (Hildegardt Whites) se reaksie saamstem nie. Have a heart!
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
Suidooster
Soos Lee-Ann (Portia Joel) hierdie week wys, doen mens snaakse dinge buite jou karakter wanneer jy bang is. Nes Lee-Ann, sou ek ook maar paranoïes wees as ek tot daardie vlak moes daal. Dit sit nie in enigiemand se broek om so genadeloos op te tree nie. Ek weet nie of ek haar moet geluk wens en of ek moet bang wees nie.
Maar ek vat eerder my kanse met Lee-Ann as met Kaashifa (Jawaahier Petersen) op die oomblik. Sy is op die oorlogspad en danksy die dinge wat Rhafiek (Irshaad Ally) aanvang is hy nommer een op haar hit list. Min weet sy dat haar woede eintlik op Nazeem (Irvine van der Merwe) moet wees. Maar Siya (Gantane Kusch) sien nie eens die gevaartekens raak nie. Hy beter wakker skrik of hy sit met ernstige regskwessies. Vandat Mo (Alushay Klazen) haar makeover gekry het is sy uitgeslaap en hou die kind haar met grootmens dinge besig.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
Binnelanders
Dit is nou of nooit vir Nicolette (Kate Roothman) en Uys (Gerald Steyn), maar gaan hulle regtig daardie volgende stap neem? Ek weet darem nie of ek so ver vir ’n strandhuis sou gaan nie…
Ten minste is hulle nie Naomi (Je-ani Swiegelaar) wat vir Tracy (Melinda Viljoen) in ’n interessante posisie gevind het nie. Ek skaam my dood!
Maar selfs dit is beter as die ongemak waarin Joe (Roberto Kyle) homself bevind noudat sy geliefde oom op sy ma verlief geraak het. Gaan hy intree of gaan hy dinge so los?
Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai.
