Daar is ’n groot verskil tussen omgee en inmeng. Ná verlede week, weet ek nie of ons sepie-karakters die verskil tussen die twee kan insien nie. Sepies op ons radar die week sluit in Suidooster en Binnelanders.
Binnelanders
So gepraat van mense wat kamstig omgee: At Koster (Hans Strydom) is terug en wil nou skielik die strydbyl tussen hom en Delia (Odelle de Wet) begrawe. En nie hoe nie – At wil ’n trust vir Amalia vestig. Delia het net rooi gesien toe sy verlede week instap en baba Amalia in At se arms sien. Wie sal nou nie ’n ryk oom soos At Koster in die familie wil hê wat jou net wil bederf en finansieel bystaan nie? Hy mag dalk soos ’n onskuldige ou oompie lyk, maar At is alles behalwe. Ek glo nie hierdie “nuwe” afgetrede, sogenaamde vredeliewende man se stories nie.
Ons moet wel vir hom krediet gee, want hy draai nooit doekies om nie. Só ook nie verlede week toe hy aan Delia erken het dat hy nooit van haar gehou het nie. Mense sê dikwels die waarheid maak seer, en sjoe dit is waar, want toe At vir Delia sê dat sy nie goed genoeg vir sy seun was nie, kon ek deur die TV die mes deur haar hart voel steek. Delia is ewe slinks, so ek kry haar nooit jammer nie, maar ek sou ook in hierdie geval vir At gesê het om sy ry te kry. At voer altyd iets in die mou en die Binnelanders sal maar hierdie week op hul hoede moet wees, want kyk wie is toe die anonieme koper van die super-ER se grond! Ek sal glad nie verbaas wees as At agter die ontploffing sit nie. Nou weet ons hoekom hy niks met Binneland of die super-ER te doen wou hê nie… ’n Groter skurk as At Koster is daar nie. Ek kan nie wag om te sien watter bomme die week gaan bars nie!
Kyk Binnelanders op DStv Online.
Suidooster
Ons almal weet Elana (Esther von Waltsleben) wou nog altyd ’n ma wees, maar haar beskerming van Maggie (Daniah de Villiers) raak nou te veel. Aanvanklik het ek gedink Elana het uitgereik sodat Taylor by haar kan kom bly, maar nou lyk dit asof sy nie net klein Taylor se ma wil wees nie, maar sommer Maggie se ma ook.
Al het haar ouers vir haar verwerp, is Maggie ’n sterk vrou. Saam met Ryno (Alex van Dyk), lyk dit asof hulle goed vir hulself kan sorg. Elke bietjie help, maar ek sal nie vir Ryno blameer as hy nou gatvol vir Elana se “goedhartigheid” raak nie. Dit was baie sweet toe Elana aan die begin wou help en vir Taylor ’n nuwe stootwaentjie gekoop het. Of selfs toe sy na Taylor omgesien het terwyl Maggie studeer het. Maar hulle eet dan nou amper elke aand by haar huis. Obsessed much? Dit het immers reeds ’n nuwe verhouding laat sneuwel. Ek sal nie verbaas wees as Elana se kop een van die dae uithaak en sy vir Maggie en Taylor in haar huis opsluit nie.
Maggie beter vinnig besluit of sy hierdie week saam met Ryno wil trek. Dan moet sy sommer in die middel van die nag verdwyn. Ek dink nie Elana gaan hulle so maklik laat gaan nie. Kate (Annelisa Weiland), Mymoena (Jill Levenberg), Bianca (Simone Biscombe) en Siya (Gantane Kusch) is al moeg gepraat, maar Elana wil net nie hoor nie en weet ook nie wanneer om te stop nie. Ek is nou nie ’n Nostrodamus nie, maar ek sien moeilikheid kom…Watch this space!
Kyk Suidooster op DStv Online.
