In 2007, het ons die eerste keer vir Poena Pieterse in die ikoniese fliek Poena is Koning ontmoet. En toe het hy in 2020 in die TV-fliek, Poena, teruggekeer, asook in 2021 in die TV-fliek, Poena en Poenie.
In dié komediereeks van 13 episodes ontmoet ons vir Poena (Robbie Wessels) wat sy werk as ’n sanger op ’n plesierboot verloor het. Nou woon hy saam met sy werklose nefie, Poenie (Kaz McFadden), by sy oupa Poen (At Botha). Ook saam in die huis is Coco de Kok (Liane Heyl) en haar dogter Chanel (Lauren Botha). Jy kan jou mos net indink die chaos wat in daai huis afspeel…
Die reeks volg die nefie-paar as hulle Poen’s Plumbing oorneem. Hul leuse: “Ons is nommer een in die nommer twee game”. Jip, toilethumor is volop. Ons protagonis droom egter steeds daarvan om ’n sanger te word en kry vir Elton Lamoer (Reginald Hufkie) as sy musiekvervaardiger. Intussen vang ’n sexy paaldanser, Shakira Haasbroek (Danielle Retief), ook sy oog.
Weeklikse episodes vanaf Maandag, 4 April om 20:00 op kykNET (DStv-kanaal 144) en DStv Online.
