Die ses spanne het vyf dae om die badkamers van hulle onderskeie eenhede in te rig – van installasie van al die watertoevoerpype en die waterdigting tot die teelwerk en finale afronding. Vyf dae klink dalk na baie, maar die Klein Paradys-deelnemers het gou agtergekom dat daar nie genoeg minute in die dag is om by alles uit te kom nie…
Min slaap, min eet en ’n traan of drie
Jannie en Mika het uiteindelik skroewe gekry sodat hulle met hulle werk kan aangaan, maar hulle is steeds agter. “Ons is nou by plan B se plan C se plan D wat nou plan A moet begin as plan A se plan B,” het Jannie gespot.
Johann en Jo-Ann was pro-aktief en het as toesighouers ’n skedule opgestel sodat elke span kan besluit in watter tydgleuf hulle hulp van die konstruksiespan wil kry. Die ander spanne was heel geneë met die plan, maar Jannie en Mika het sommer vinnig ’n uur verloor nadat hulle gestraf is omdat Jannie ’n stuk gereedskap oornag in hul eenheid gehou het.
Maggie en Gerrie het ’n video-oproep met hulle kinders gehad, en dit was vir beide van hulle baie emosioneel. Maar dis nie net oproepe na kinders wat die spanne emosioneel maak nie. Min slaap en min eet begin beslis sy tol eis. Die wagte voor die meeste van hul monde is weg, en daar word heelwat geswets uit pure frustrasie. Die spanne besef ook dat iets soos teelwerk ’n kuns is. En dat ’n plafon nie sommer net vir gou-gou insit is nie.
Die &*%$# uitspan-area!
Dit is duidelik dat nie een van die spanne juis daarvan hou om aan die uitspan-area te werk nie. Toe Brandt, die projekbestuurder, dus die spanne aantree om werk aan hulle eenhede te staak en eers aan die uitspan-area se vloere aandag te gee, was niemand beïndruk nie. Maar spanwerk het gewys selfs dié taak kan vinnig baasgeraak word as daar genoeg gewillige hande is.
Wat volgende?
In episode 6 kom die beoordelaars om die spanne se badkamers punte te gee. Maar gaan al die spanne iets hê om te wys?
Klein Paradys is op Donderdae om 20:00 op kykNET (DStv-kanaal 144). Dit is ook op DStv Stream en Catch Up beskikbaar.
