In Evita in Excelsior is Tannie Evita is nou al 87 jaar oud – haar stories en herinneringe is volop. Daarom hark sy haar ou staatmaker en persoonlike assistent, Bokkie Bam, nader om aan haar outobiografie te help skryf. Dit lei natuurlik tot ’n paar reise down memory lane… én die uitlap van ’n hele paar geheime.
Intussen woon Tannie Evita se drie kleinkinders, Winnie-Jeanne (19), Nelson-Ignatius (16) en LaToya-Ossewania (13) by haar in Excelsior – ’n ou herehuis in Johannesburg wat sy namens die ANC bestuur. Tussendeur herinneringe opdiep, moet sy dus ook met die tieners se probleme en moderne opinies byhou.
Evita in Excelsior sluit van Tannie Evita Bezuidenhout se geliefde storiemonoloë in. Daar is ook ’n paar ikoniese onderhoude wat aan haar belangrike bydrae tot Suid-Afrika herinner.
Die rolverdeling sluit in Pieter-Dirk Uys as Tannie Evita, Lizz Meiring as Bokkie Bam, Vinette Ebrahim as Ella, Royston Stoffels as Cecil, asook Brümilda van Rensburg, Hannes van Wyk, Martin Kluge, Veronique Jepthas, René Cloete, Ayden October, Brent Vermeulen en Tevin Musara.
Tinarie Van Wyk-Loots het die regie behartig.
Kyk vanaf 10 Januarie om 20:00 op kykNET (DStv-kanaal 144), op DStv Online of op Catch Up.
