Menu terloops
In Gons [7 Jun 2024]

Kyker-gunsteling keer terug na ‘Diepe Waters’


Een van kykers se gunsteling-sepieakteurs, Mandi du Plooy-Baard, keer terug na onse sepiewêreld as sy die rol van Theresa in ‘Diepe Waters’ hervat.

Stroom 'Diepe Waters'

Kyker-gunsteling keer terug na ‘Diepe Waters’

Die aktrise Mandi du Plooy-Baard, veral bekend vir haar rolle in Getroud met Rugby en Egoli, hervat vanaf Maandag, 10 Junie, haar rol as Theresa in Diepe Waters. Sy en Jacques (Werner Coetzer) was mos jare gelede kortstondig saam en sy het swanger geraak. Jacques se pa, Gys, was toe woedend en hulle moes die swangerskap wegsteek. Dit het uiteindelik uitgekom dat Johan, wat Sanet en Rossouw as hul eie kind grootgemaak het, die baba is wat weggesteek is. Nou is Theresa terug… Maar hoekom?

Mandi vertel meer oor haar terugkeer tot die Diepe Waters-stel.

DIEPE WATERS, Mandi du Plooy-Baard
Mandi du Plooy-Baard se Diepe Waters-karakter, Theresa, keer terug en dit lyk asof Jacques heel gelukkig daaroor is… Foto: Verskaf

Kykers het al vir Theresa leer ken, maar vertel ons meer van wat ons hierdie keer kan verwag?

‘Hierdie keer ontmoet hulle ’n nuwe Theresa. Oftewel, die ware Theresa. Dit beteken nie alles verloop maklik en vlot nie, maar haar hart is ligter en sy is vasbeslote om haarself weer te vind en haar lewe terug te wen.”

Wat geniet jy van dié rol?

“Ek is mal oor die diepte van my karakter. Die seer in haar donkerste tyd, haar vrese, maar ook haar egte menswees. Dit is ’n karakter wat vir mens die geleentheid bied om wonderlike storielyne aan te pak en belangrike stories te vertel wat gehoor moet word.”

Mandi du Plooy-Baard as Theresa in Diepe Waters. Foto: Verskaf

Glo jy dat geheime altyd ’n manier het om op die lappe te kom?

“Sjoe, dis moeilik. Ek dink so, ja, want ek kan nie dink hoe mense eerstens so opgekrop kan loop nie. En ek weet nie hoé mense al die leuens kan onthou nie.”

Wat is die geheim of onopgeloste saak waaroor jy die nuuskierigste is?

“Madeleine McCann, die meisie wat in Brittanje weggeraak het en Inge Lotz se moordsaak. Ná al hierdie jare spook dit nog by my. Ek kan my nie indink dat hulle arme ouers steeds nie closure kan kry nie.”

Buiten in jou rol as Theresa, waar anders kan ons jou sien?

“Ek doen gereeld oorklankingswerk en motiveringspraatjies en is ook tans besig om aan Leon van Nierop se nuutste radiovervolgverhaal te werk. Radioteater is beslis ’n hoogtepunt vir my en iets wat ek elke dag sal kan doen. Verder is ek mamma, so dit hou my baie besig!”

Teenoor wie sal jy nog wil speel?

“Ek het al die voorreg gehad om teenoor ongelooflike Suid-Afrikaanse akteurs te speel en by hulle te leer. Dit bly ’n lekkerte om vir die eerste keer saam met iemand te werk, hetsy nuwe talent of ouer, ervare akteurs. Maar ek dink tog ek neig na ’n Hollywood-akteur of twee. Soos Sandra Bullock – ek is mal oor haar as aktrise – en Gerard Butler, oor wie ek sekerlik nie nodig het om oor uit te brei nie…”


Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

15

Van ‘Bridgerton’ tot ‘Shaka iLembe’: 15+ periodedramas om nou te kyk

Van die Shelby-broers se bloederige vuiste in ‘Peaky Blinders’ tot dáái koetstoneel in die derde seisoen van ‘Bridgerton’. Hier is ons keur van die beste periodedramas wat jy tans kan stroom. 

Meer
18

Wat om te kyk: 18+ epiese boeke wat in TV-reekse omskep is

Soveel boeiende boeke wat omskep is in soveel skitterende TV-reekse. Hier is ons keur van dié reekse wat jou gaan bekoor, inspireer en ontroer.

Meer

Redakteurskeuse vir Junie 2024: Grootse ‘House of the Dragon’ keer terug, Federer se finale dae, Celine Dion se stryd, en nog

Wat om te kyk: Roerende dokkies oor Celine Dion en Roger Federer, die tweede seisoen van die epiese 'House of the Dragon' en deel twee van 'Bridgerton' se derde seisoen tel onder my keur van TV-vermaak vir vandeesmaand se redakteurskeuse.

Meer

Jou ‘Diepe Waters’-gids vir Junie 2024

Daar is ’n skokkende voorval by die swemklub, Zelda is ongelukkig en ’n onwelkome gas verskyn op Sanet se drumpel. Dít en nog meer is waarna 'Diepe Waters'-kykers in Junie kan uitsien. Hier is ons handige kykgids.

Meer
Sien alle opsies