Menu terloops
In Wat om te kyk [11 Okt 2023]

Afrikaans kook groot! 25+ Afrikaanse kosprogramme om op DStv en Showmax te kyk


Ons is maar net mense, ons dink met ons pense… En daar is wraggies baie kosprogramme – in Afrikaans – waarin lipafleklekker geregte opgedis word.

Deur Watkykjy
Afrikaans kook groot! 25+ Afrikaanse kosprogramme om op DStv en Showmax te kyk

Neem asseblief kennis dat die kosprogramme se beskikbaarheid moontlik kan verander.

Kos vorm die wêreld oor deel van mense se kulturele diversiteit. Omdat Suid-Afrika self so diverse land is, het ons nogal ’n veelsydige palet wat deel van ons land se identiteit uitmaak. Kyk, ons laaik van ’n happie kos. Ons bak en brou, kook en braai en, as ons oorpresteerders is, groei, soek, vang of jag ons soms ook. Van ons oumas se oumagrootjies het ons lipafleklekker-wenresepte geërf, en as ons die gode wil uitdaag, pas ons soms dié resepte aan. 

As die kwessie van ’n ander land se kultuur in ’n casual gesprek tussen vriende (wat humble brag oor hulle onlangse reistogte) opkom, kan ek jou amper waarborg dat jy vinnig ’n spys-en-drank-konneksie kan maak.       

Dit is dus geen openbaring dat die Kook en Geniet digby die twee miljoen kopieë verkoop het sedert die eerste uitgawe in 1951 nie. Tegnologie soos die internet en TV het ook ’n reuse-impak gehad op hoe ons kos en kookkuns benader en beywer. Jy kan deesdae letterlik resepte van kenners en kokkedore op  jou skootrekenaar volg terwyl jy die hele kombuis breek. Of, net vir sommerso ontspanning, kan jy ’n celeb chef se tegnieke deur osmose inneem vanuit die gemak van jou nes van Oros, aartappelskyfies en KitKats op die rusbank.  

Vir laasgenoemde aktiwititeit, het ons het ’n lys van die beste kosprogramme – in Afrikaans – op Showmax en DStv saamgestel. Lekker kyk! 

Realiteitstelevisie is groot 

Masterchef Australia is die groot pappa van mededingende kookprogramme wat die TV-sluise in 2009 oopgemaak het en Afrikaans het nie vir lank buite die kombuis gestaan en wag nie. In Kookpunt daag sjefs en aanbieders Yolani Abrahams en Chris Erasmus weekliks drie chefs uit om deur drie disse voor te sit wat uit lukrake bestanddele opgetower word. 

Kookpunt
Yolani Abrahams en Chris Erasmus is die beoordelaars op Kookpunt. Foto: Verskaf

In ’n soortgelyke program, Aansit, ding spanne van drie mee om ’n benydenswaardige kontantprys te wen. Elke span moet ’n driegangmaaltyd om die hoofbeoordelaar en supersjef, Reuben Riffel, uit die veld te slaan.            

Laat die Potte Prut sien hoe drie spanne meeding om die beste potjiekos te maak voordat die horlosie hulle inhaal. 

Natuurlik moet daar ook gebraai word en Suid-Afrika se gunstelingtydverdryf is nou ’n sosiale eksperiment op televisie. In Kom Ons Braai moet drie paartjies – wat mekaar glad nie ken nie – by mekaar braai. Daar gebeur baie om die vuur, en ons praat nog nie eers van die kos nie!

Is jy dalk lus vir ’n weergawe van Kitchen Nightmares maar sonder Gordon Ramsey en sy vuil bek? Supersjef Bertus Basson en sy span help om restaurante en gesinskosondernemings wat In Die Sop is, weer op die been te bring.

Bertus Basson
Bertus Basson. Foto: Verskaf

Kokkedoor is sekerlik dié bekendste realiteitskookprogram in Afrikaans. Hierin word Suid-Afrika se beste sjef, op die trant van die Masterchef-formaat, gesoek. Die program was só ’n groot treffer dat dit gelei het tot ’n spin-off, Koekedoor, om die land se beste en veelsydigste amatuerbakkers op te spoor.    

’n Nuutjie wat deel van die Kokkedoor-franchise vorm, is Kokkedoor Vuur & Vlam op kykNET. Hierin moet deelnemers sake in die kombuis met hul braai-talente uitspook.

Voel goed, eet goed

Sekere TV-persooonlikhede het nou maar net ’n manier om meer intiem met die kyker te connect. Wat veral goed werk, is die nostalgiese inslag.    

Tiaan Proe, Afrikaanse kosprogramme
Tiaan Langenegger. Foto: Verskaf

Kokkedoor-wenner, Tiaan Langenegger, laat jou voel of jy die heerlikste kos deur die skerm kan proe in Tiaan Proe en laat familie, goeie tye en hartskos herleef deur sy nostalgiese kosherrineringe. (Lees ook ons onderhoud met Tiaan oor dié reeks.)

Die grapmaker van die gewilde TV-program, Maak ’n Las, Nico Nel, kan behoorlik ’n storie vertel. In Nico Nel Kook en Vertel verken hy die geheime van ons land se beste bestanddele en resepte.

Nataniël is ’n absolute feesmaal op sy eie. Dis kos met persoonlikheid. GROOT persoonlikheid. Terwyl Ek Wag is by verre my gunsteling Afrikaanse kookprogram. Hierin droom Nataniël heerlike disse op wat deur sy Frans-Hugenote-erfenis geïnspireer is. Dít terwyl hy die hedendaagse invloed van sy voorvaders op landbou, wyn en kookkuns in Suid-Afrika ondersoek. 

Kyk ook gerus Die Nataniël Tafel. Dis terwyl jy dié reeks kyk wat jy besef dat nie almal kan kos maak soos Nataniël nie… En dat hy meer is as ’n dramaturg, skrywer, satirikus, komponis, sanger, skoonheidskundige en digter. En dis reeds ’n mondvol. 

Afrikaanse kosprogramme Nataniel Edik van Nantes
Nataniël het heelwat reekse op die kassie, ook saam met sy broer, Erik. Foto: Verskaf

Dan is daar ook ’n eiesoortige kitskosreis wat kykers saam met Gerhard Steyn en Alvin Bruinders kan vat in Konings van Kitskos. Die VIA-reeks reis dié vriende die land heen om die lekkerste kitskos te proe en ook die kleurvolle karakters wat dit maak te ontmoet.

Die nuwe reeks Herman en die Ladies, ook op VIA, het ’n pragtige aanslag. Daarin bederf die bekroonde sjef en kosskrywer, Herman Lensing, vir tien vroue – wat elkeen ’n stryd teen borskanker gevoer het, met heerlike gebak in die Pink Lady-kombuis terwyl hulle gesels oor die soet en suur van die lewe. Terwyl lewenslesse wat elke vrou op haar kankerpad geleer het, gedeel word, is die reeks ook viering van elk se merkwaardige gees en storie.

In Skep nog op VIA nooi die tuiskok René de Wit bekende koskenners om saam met haar te kook. Die kinkel is dt sy oorskietgeregte of -bestanddele inspan om ’n splinternuwe gereg op te tower – so wys René vir kykers hoe om oorskiet in geurige disse te omskep. Daarmee saam word die verpakking ook in nuwe items omskep eerder as wat dit in die asblik beland. Onder die koskenners wat saamkuier tel Marinda Engelbrecht, Isabella Niehaus, Ina Paarman en Carmen Niehaus.

Kook en rits rond

Min van ons het ’n geldjie om gereeld oorsee te galavant, so ons moet kulinêre fantasieë maar uitleef deur dié wat dit wel kan doen en vir ons netjies verpak en voorsit. 

Kampkos is darem sekerlik binne meeste van ons se bereik? John-Henry Opperman en Beáte Olwagen wys vir ons hoe om in die buitelug te bak en braai terwyl hulle ook interessante gaste nooi om hulle buitelug-vaardighede te kom spog en hul beste kampkosresepte met ons te deel.       

Bekroonde Afrikaanse auteur, Marita Van Der Vyver, woon al reeds meer as twee dekades lank in Frankryk. In Marita Kook Frans besoek sy die suide van Frankryk en deel die streek se kos, asook haar eie kulinêre avonture en ervarings. Haar boek Dis Koue Kos, Skat is verwerk na ’n fliek wat jy op Showmax kan kyk en haar topverkoper, Dinge Van ’n Kind, is in ’n TV-reeks vir kykNET omskep.   

Wie is Jan Scannell? Dis Jan Braai, man! Hy neem ons op ’n onvergeetlike braaitoer regoor Suid-Afrika in Jan Braai vir Erfenis. Veertig braaie in veertig unieke Suid-Afrikaanse erfenisliggings.

Suid-Afrika se eerste Michelin-ster-sjef, Jan-Hendrik van der Westhuizen, neem ons saam na sy restaurantkombuise, reise deur Europa en aan’t huis in Suid-Afrika terwyl hy sy kosgeheime met ons deel in Jan.

Jan, Afrikaanse kosprogramme
Jan-Hendrik van der Westhuizen. Foto: Verskaf

Dit voel net reg om weer ’n draai by Nataniël te maak. Tydens elke Europese winter is Nataniël uit sy nate in Nantes en deel met ons ons die winter, sy geheime, sy kos, tradisies en rituele in Edik Van Nantes: Winter. Nataniël se broer, Erik Le Roux, is ’n professionele sjef wat by hom aansluit in Nantes Kookboek Met Nataniel En Erik. Daarin gesels hulle oor hul kookboek, hul kinderdae en al hulle reise en avonture. 

Honger vir nog? Kyk oor gerus uit vir die volgende kos en -kookprogramme:

My Ma Kook Beter as Joune

Toegang

Kokkedoortjie

Roer

My Kitchen Rules South Africa

Cooking with Siba

Something’s Cooking

Celeb Feasts with Zola

Top Chef Junior

The Great South African Bake-off

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

18

Wat om te kyk: 18+ epiese boeke wat in TV-reekse omskep is

Soveel boeiende boeke wat omskep is in soveel skitterende TV-reekse. Hier is ons keur van dié reekse wat jou gaan bekoor, inspireer en ontroer.

Meer

Redakteurskeuse vir Junie 2024: Grootse ‘House of the Dragon’ keer terug, Federer se finale dae, Celine Dion se stryd, en nog

Wat om te kyk: Roerende dokkies oor Celine Dion en Roger Federer, die tweede seisoen van die epiese 'House of the Dragon' en deel twee van 'Bridgerton' se derde seisoen tel onder my keur van TV-vermaak vir vandeesmaand se redakteurskeuse.

Meer

Jou ‘Diepe Waters’-gids vir Junie 2024

Daar is ’n skokkende voorval by die swemklub, Zelda is ongelukkig en ’n onwelkome gas verskyn op Sanet se drumpel. Dít en nog meer is waarna 'Diepe Waters'-kykers in Junie kan uitsien. Hier is ons handige kykgids.

Meer

Jou ‘Suidooster’-gids vir Junie 2024

Rhafiek en Kaashifa sukkel om op dieselfde bladsy te kom en Elana ontdek ’n splinternuwe gawe – 'Suidooster'-kykers kan na dít en nog meer in Junie uitsien. Hier is ons handige kykgids.

Meer
Sien alle opsies