Vanaf Maandag 7 Oktober 17:30 is André de Villiers, wat kykers van die gewilde program André 4×4 ken, te sien in die nuwe kykNET-program, 1 Spoor Avonture. Daarin durf hy saam met Franswa Smit en Hannes Strydom die pad op hul motorfietse aan.
Franswa en Hannes is albei avontuur-motorfietsryers en die stigters van MyBike Adventures & Touring (MBAT). Franswa is ook die stigter van Motor Cycle Camping South Africa.
Die driemanskap verken van die mooiste plekke in Suid-Afrika, insluitende Amersfoort, Tzaneen, Mariepskop, die Blyderivier-canyon en Kaapschehoop.
Daar is ’n besondere bekoring in die vryheid wat ’n mens ervaar wanneer jy op ’n grondpad met ’n motorfiets die oop pad aandurf – die gebrul van die enjin onder jou, die ongerepte natuurskoon wat jou omring. En dís die storie wat 1 Spoor Avonture wil vertel, aldus André.
“1 Spoor Avonture gaan oor die lewe op avontuur-motorfietse. Die ryers se avonture, dit wat hulle met die motorfietse aanvang, en talle wenke word in elke episode met kykers gedeel,” vertel André.
“Daar is ’n besondere bekoring in die vryheid wat ’n mens ervaar wanneer jy op ’n grondpad met ’n motorfiets die oop pad aandurf – die gebrul van die enjin onder jou, die ongerepte natuurskoon wat jou omring… 1 Spoor Avonture wys die kameraadskap van ’n groep ryers wat saam ontdek, impulsiewe roetes verken en legendariese verhale agternasit.”
1 Spoor Avonture word vanaf Maandag, 7 Oktober 2024, om 17:30 op kykNET en DStv Stream (DStv-kanaal 144) uitgesaai. Dit sal ook na uitsending op Catch Up beskikbaar wees.
