Wat gaan aan by Wilgenhof? Dié legendariese manskoshuis van die Universiteit van Stellenbosch is sedert Februarie in die nuus ná daar foto’s van twee kamers in die koshuis versprei het. Die kamers was gevul met ontstellende artefakte en gerugte het begin loop oor verdagte aktiwiteite waar oor dekades gebeur het.
In die uurlange Onthul – Wilgenhof: trauma of tradisie? kom kwessies soos tradisie, woke-kultuur en toxic masculinity onder die loep.
Ná die ontdekking van die kamers, het die universiteit dadelik die kamers gesluit, leeggemaak en oorgeverf. ’n Onafhanklike paneel is aangestel om ondersoek in te stel en aanbevelings te maak oor wat die volgende stap moet wees. Hul raad was dat die koshuis gesluit moet word. Dít het egter onmin tussen twee kampe veroorsaak. Aan die een kant was daar oud-inwoners en ondersteuners van Wilgenhof wat meen die koshuis is ’n kulturele en historiese baken. Die groep meen dat die US al dekades lank ’n vendetta teen Wilgenhof bedryf. Só ook dat die verslag bloot gebruik sou word om hul sin te kry.
Aan die ander kant is daar diegene meen Wilgenhof is reeds dekades lank met verdagte aktiwiteite besig. Hulle meen die koshuis is uit en uit ’n euwel.
Van die deelnemers aan die program is die joernaliste Adriaan Basson en Jo Prins, die grondwetkenner Prof. Pierre de Vos, die sielkundige Anton Böhmer en prof. Vasti Roodt. Voormalige Wilgenhoffers soos Neels van Jaarsveld, Samore Menze en Louis van der Riet praat ook saam.
Onthul – Wilgenhof: trauma of tradisie? is deur Idea Candy vervaardig. Die ondersoekende joernalis Pieter-Louis Myburgh, die regisseur Nina Swart en die vervaardiger Wynette Theart het agter die skerms gewerk.
Onthul – Wilgenhof: trauma of tradisie? word op 6 Oktober om 20:00 op kykNET en DStv Stream (DStv-kanaal 144) uitgesaai. Dit sal ook ná uitsending op Catch Up beskikbaar wees.
