Martin Freeman (The Hobbit-trilogie, Fargo) lewer uithalerspel in die BBC One-drama, The Responder. Hy speel Chris Carson, ’n polisiebeampte wat sukkel om kop bo water te hou.
Die reeks speel in Liverpool af en die draaiboek is deur ’n voormalige polisiebeampte van dié stad, Tony Schumacher, geskryf. Volgens Schumacher is die vyfdelige reeks fiktief, hoewel dit wél geïnspireer is deur die uitdagings wat hy deur die loop van sy loopbaan teëgekom het.
Die storie volg Carson terwyl tydens die nagskof aan diens is. Ons sien hoe hy telkens tot op die rand van ’n senu-ineenstorting gedruk word.
Buiten die bekroonde Freeman, sluit die rolverdeling ook vir Adelayo Adedayo, Ian Hart en MyAnna Buring in.
The Guardian is vol lof vir The Responder en skryf dat dit “so vinnig en meesleurend as ’n riller, en so aangrypend soos ’n dokumentêr” is.
The Responder het ’n punt van 100% op die resensiewebwerf Rotten Tomatoes.
Vanaf 1 Augustus op Showmax.
