Nataniël mors nie in die kombuis nie – dít het ons reeds geleer in sy gewilde kookprogramme Die Nataniël Tafel, en Edik Van Nantes (op Showmax beskikbaar), maar in sy nuutste TV-produksie, word ons net weer herinner aan die kunstenaar se skynbare eindelose talente.
In Terwyl Ek Wag, neem Nataniël die Kaapse Wynlande op horings as hy drie maande lank op ’n plaas tussen Kaapstad en Stellenbosch deurbring en lipleklekker disse opwip wat deur sy Franse erfenis geïnspireer is. Terselfdertyd ondersoek hy ook die invloed van die Frans-Hugenote op Suid-Afrika se landbou-, wyn- en kookbedryf.
“Terwyl Ek Wag klink dalk soos net nog ’n kookprogram,” sê Nataniël, “maar dit is veel meer en gepas vir hierdie vreemde tye. Die geskiedenis herhaal gereeld en op verskeie maniere.”
Vervaardiger Berdene Burger voeg by: “Nataniël verweef die praktiese alledaagse lewe met betowerende inspirasie.”
