Dit is vierde jaar wat die Suidooster Stormsterk-konsert aangebied word. Volgens die sepie se publisiteitsbestuurder, Wilmer Müller, het dit nog elke jaar uitverkoop.
Die hoofgroep akteurs wat optree, is Natasha van der Merwe, Jawaahier Petersen, Irvine van der Merwe, Jill Levenberg, Eden Classens, Craig Adriaanse, Richard September, Simone Biscombe en Dean Smith.
Die res van die sepie se rolverdeling maak ook verrassende verskynings en daar word ook ’n storielynkinkel of twee wat nog op televisie moet uitspeel, tydens die konsert onthul.
“Vanjaar se konsert is ook die afskop van Suidooster se tiende verjaarsdagvieringe en dit beloof om die gehoor op hul voete hê met talle liedjietreffers,” sê Müller. “Sepiekarakters soos Mymoena, Kaashifa, Wade, Bennie, Gary, Juicy Justin, Suzy, Bianca en die sluwe Nazeem gaan nie net vir vermaak uit die boonste rakke sorg nie, maar hulle gaan ook die gehoor om die beurt ’n traan laat pik en skaterlag. Ons sien veral ook uit om Alistair Izobell op die verhoog te verwelkom om die Suidooster-temalied te sing.”
Volgens Jana Hattingh, uitvoerende hoof van die fees, stap Suidooster al ’n lang pad met die Suidoosterfees.
“Ons het vir die eerste keer in 2020 tydens die Covid 19-pandemie met die sepie hande gevat toe ons saam ’n inryteater by Atlantic Studios, die tuiste van Suidooster, in Montague Gardens aangebied het. Sedertdien het ons saam talle suksesvolle projekte aangebied.”
Die musiekregie van die konsert, wat op Saterdag 3 Mei om 17:00 plaasvind, word deur Melissa van der Spuy hanteer. Dit word ook in samwerking met The Stage Performing Arts Studio van Durbanville gedoen, wat onder meer help met die choreografie en verhoogbestuur, terwyl kykNET, Tafelberg Meubels en Biggi Popcorn die borge is.
Suidoosterfees vind van 30 April tot 4 Mei by Kunstekaap plaas. Vir die volledige feesprogram, besoek www.suidoosterfees.com. Kaartjies kan bespreek word by Webtickets, of skakel Artscape dial-a-seat by 021 421 7695.
Kliek hier om kaartjies te koop.
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
