Hier is waarna jy hierdie week (10 tot 14 Februarie) op Suidooster, Skemergrond, Diepe Waters en Binnelanders kan uitsien.
Diepe Waters
Zelda (Sandi Schultz) konfronteer vir Gys (Justin Strydom) oor sy geheim. Op daai oomblik lyk dit asof die aarde hom kan insluk. Dit kry ’n mens van double agent speel en dink dat geheime nooit gaan uitkom nie! Julle moet sien hoe René (Marijke Coetser) hierdie week dinge hanteer. Geen skaamte nie; die “beste” vriendin ooit. Maar danksy Karla (Daniélle Swanepoel) se dapperheid, het René (Marijke Coetser) baie om oor dankbaar te wees. En selfs Fourie (David Louw) verbaas ons hierdie week.
Nina (Reze -Tiana Wessels) probeer ’n nuwe bladsy omslaan, maar ek dink nie ek sou so maklik kon vergeet en vergewe nie. Nie nadat Nina die afgelope paar weke in so ’n brat verander het nie. Maar wat gaan Rose (Eloise Cupido) sê wanneer sy uitvind van haar man se skelmpie? Ek dink sy sal dieselfde reaksie hê as iemand anders wat hierdie week die waarheid moes hoor…
Intussen het Pam (Tracey-Lee Oliver) twee opwindende nuwe projekte en ek kan nie wag om te sien hoe sy haar Pam-magic laat skyn nie. Dit gaan pret wees!
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Wade (Dean Smith) wil met spoke speel hierdie week en Bridgett (Denise Newman) is heeltemal teen die idee gekant. Ek stem amper nooit met Bridgett se keuses saam nie, maar hier móét ek, want ek glo ’n mens moet die dooies in vrede laat. Behalwe as hulle soos Damian (Caleb Felix) in die werklike lewe onmin gesaai het, want dan word alle reëls seker maar uit die venster gegooi.
Elana (Esther von Waltsleben) kry ’n kuiergas wat haar en Susan (Natasha van der Merwe) se verhouding gaan uittoets. Ek is altyd opgewonde oor ’n bestie-vakansie, maar ’n mens moet darem weet wie jy in jou spasie toelaat. Ek beskerm altyd die energie in my huis, so julle sal Susan se optrede verstaan wanneer julle hierdie karakter ontmoet.
Ek hoop Rhafiek (Irshaad Ally) het die polisie op speed dial, want hy doen ’n Gys-move hierdie week wat Kaashifa (Jawaahier Petersen) haar laatste varkies kos. En al verstaan ek hoekom hy dit gedoen het, is haar reaksie presies wat ek verwag het! Hy moes van beter geweet het…
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Suidooster is ook beskikbaar op Catch Up, DStv Stream en Showmax.
Binnelanders
Die knop in my maag was dié week seker net so groot soos Louis (Germandt Geldenhuys) s’n. Hy ontvang nuus wat sy toekoms gaan bepaal en net betyds vir ’n kuiergas wat hulle op hul tone gaan hou.
Met die troue wat verby is, kan Gaby (Maude Sandham) weer op haar eie liefdeslewe fokus. Dit beteken sy moet ’n paar ongemaklike gesprekke hê en julle kan net raai hoe Gaby oor haar woorde val.
LJ (Julian Robinson) is bekommerd oor Ella (Marlee van der Merwe) nadat hy die waarheid oor haar kêrel se eks hoor. Hy is veral ongemaklik danksy die nuwe verwikkelinge rondom Riekie (Zandélle Meyer). Dit is ’n situasie waarin ek nie wil wees nie. Hoe slaap ’n mens in vrede? Maar LJ bevind homself in die moeilikheid vir meer as een rede hierdie week…
Binnelanders word vanaf Maandag tot Vrydag om 19:30 op kykNET en DStv Stream (DStv-kanaal 144) uitgesaai.
Skemergrond
Erica (Shimmy Isaacs) kry mos altyd snuf in die neus en jy kan nie sommer maklik iets van haar af wegsteek nie. Sy ontdek iets wat sy nie moes weet nie.
Intussen bring Christine (Devonecia Swartz) iemand uit die Louws se verlede om haar grootste plan uit te voer. Hierdie een gaan seermaak, ek kon my oë nie glo nie. Dít is laag – selfs vir Christine. Geen wonder Tyler (Ruben Engel) begin nou om weg te beweeg nie. Ek sal ook nie vir iemand anders wil tronk toe gaan nie.
Beeno (Duncan Johnson) sien rooi en sy verhouding met Warren (Dustin Beck) vat ’n knou danksy koeëls wat rondom hom en sy meisie vlieg.
Shakiel (Ashley Riddles) is opgewonde oor die toekoms, maar is sy feesviering te vroeg?
Skemergrond saai weeksdae uit om 19:30 op kykNET&kie (DStv-kanaal 145) en DStv Stream. Dit is ook ná uitsending op DStv Catch Up beskikbaar.
