Arendsvlei
Die liefde kan jou darem blind maak. Ons almal was al in Saartjie (Hunter Plaatjies) se skoene, waar ons ’n vriend of vriendin probeer oortuig het dat die persoon saam met wie hulle in ’n verhouding is, nie goed vir hulle is nie. Maar ongelukkig gaan jy 99% van die tyd tweede kom. Mense moet hul eie koppe stamp en op die harde manier leer. Dit is presies wat met Daniel (Cantona James) dié week in Arendsvlei gebeur. Sy lus was groter as sy logika, maar die waarheid kom altyd uit. Daar is trouble in paradise, maar waar los dit vir Daniel en sy toekoms by die Arendsvleier?
Ten minste lyk dit asof dinge uiteindelik in die Cupidos se guns gaan draai… Maar een wonderwerk bring meer bad luck vir Beatrice (Jolene Martin) en die familie.
Kyk Arendsvlei op DStv Online
Suidooster
Help vir Zeempie (Irvine van der Merwe)! Want dié week is dit die Samsodien-familie se beurt om ’n mes in Nazeem se rug te steek. Shame, ek is nou nie Nazeem se grootste aanhanger nie, maar is daar nie een familie wat hom ’n kans wil gee nie? Maar voordat ek te vinnig vir Nazeem opkom, is dit maar seker karma se manier om hom vir al sy dade te laat boet. Die man wil net nie hoor nie en word amper uitgevang soos sy nuwe plan gestalte vind. Rita (Illse Roos) doen iets wat Nazeem amper sy gat laat sien nog voor die speletjies eens regtig begin het.
Ongelukkig is Nazeem nie die grootste slang in Ruiterbosch nie. Meer twee gevreet as Orpa (Marisa Drummond) kry jy nie. Sy sal maak dat ek nooit weer die kerk vertrou nie. Dit raak al hoe moeiliker vir Siya (Gantane Kusch) om nie sy humeur te verloor nie. Waarmee is Orpa besig? En julle sal nie glo wie dié keer vir Siya en Dani (Vashti Prins) verraai nie…
Kyk Suidooster op DStv Online.
Diepe Waters
Waar kry ’n mens deesdae betroubare familielede, want hulle is beslis nie in Diepe Waters nie! Tsepho (Johnny Potsanyane) se woorde sny diep die week, maar lê sy lojaliteit by Henry (Stiaan Bruwer) of die lang verlore Bhutis?
Almal het ’n Nina (Reze-Tiana Wessels) in hul lewens nodig, want Nina gee vir Tsepho raad wat hom help om ’n besluit te neem.
Pam (Tracey-Lee Olivier) het besluite van haar eie om te maak, maar hoe kies jy tussen twee dinge waarvoor jy al vir jare bid? Elke keuse het sy eie gevolge en ongelukkig vir Pam help Zelda (Sandi Schultz) se ultimatum nie.
Kyk Diepe Waters op Catch Up en DStv Online.
Binnelanders
In Binnelanders gaan dit altyd oor lewe en dood. Meer as een dokter vat dié week kanse wat hul gesondheid of lewens in gevaar stel. Maar selfs in moeilike tye hoop die geheime binne hierdie hospitaal op.
Met Lukas (André Lótter) terug, moet Tracy (Melinda Brink) besluit waar haar lojaliteit lê. Kies sy hierdie week haar droomdokter Tertuis (Reynardt Hugo), of is haar liefde vir Lukas net te sterk?
Kyk Binnelanders op DStv Online
