Rosemary’s Hitlist is ’n nuwe Showmax ware misdaad-dokkiereeks oor die reeksmoordenaar Nomia Rosemary Ndlovu.
Dié oudpolisielid het tussen 2012 en 2018 sluipmoorde op haar kêrel en vyf van haar familielede (onder andere haar suster) laat uitvoer om die voordele van hul lewenspolisse te bekom. Rosemary is uiteindelik in 2021 skuldig bevind en lewenslange tronkstraf vir elk van die moorde opgelê.
Die vierdelige dokkiereeks is deur IdeaCandy vervaardig – dieselfde span wat vir Devilsdorp en die meer onlangse Stella Murders verantwoordelik was.
Soos met Devilsdorp, word daar onder andere met familielede, die staatsaanklaer, misdaadkenners, die ondersoekbeampte en Rosemary se voormalige stasiebevelvoerder onderhoude gevoer. ’n Bisarre kinkel is dat sy nou ook daarvan beskuldig word dat sy – vanuit die tronk – gepoog het om dié bevelvorder en ondersoekbeampte te laat vermoor.
Rosemary’s Hitlist is vanaf Woensdag, 14 Junie 2023, op Showmax beskikbaar om te stroom.
