Die nege plaaslike stories is boonop Showmax Originals en sluit onder meer ’n dokkie in wat die rekords laat spat het.
Die top-programme, in alfabetiese volgorde, is as volg:
Adulting S1-2
Adulting volg vier mansvriende in Johannesburg. Die sterk band tussen dié groep makkers staan sterk al het die wipwarit van die lewe hulle in verskillende rigtings gestuur. Die derde – en finale – seisoen is vanaf 25 Januarie 2025 beskikbaar.
Empini S1
Die bekroonde aktrise Nambitha Ben-Mazwi, wat ook in die plaaslike Netflix-treffer Savage Beauty, te sien is, vertolk in Empini ’n private veiligheidswag wat ondersoek instel ná haar pa se dood.
House of the Dragon S1-2
House of the Dragon, gegrond op die skrywer George R.R. Martin se Fire & Blood, speel sowat 200 jaar voor die gebeure van die epiese Game of Thrones af.
Die begin van die tweede seisoen is ook die begin van die volskaalse oorlog tussen Rhaenyra Targaryen (Emma D’Darcy) en Alicent Hightower (Olivia Cooke) vir die kroon en troon ná die grusame dood van Rhaenyra se seun Lucerys in die vorige seisoen se finale.
Dié epiese reeks is as IMDb se vyfde gewildste reeks van 2024 bekroon, met D’Arcy wat vir ’n Golden Globe benoem is vir haar meeslepende spel.
Laugh Africa Presents: The Showmax Roast of Minnie Dlamini
Roastmasters Tumi Morake en Jason Goliath het die “teistering” van die mediapersoonlikheid Minnie Dlamini in dié aflewering van die program gelei. Maar Minnie was self nie op haar mond geval nie – she gave as good as she got!
Red Ink
Red Ink, ’n verwerking van Angela Makholwa se gelyknamige topverkoperboek, vertel oor ’n voormalige joernalis en nou skakelbeampte, Lucy Khambule (Nqobile Nunu Khumalo), wat deur ’n reeksmoordenaar vanuit sy tronksel genader word om sy storie te vertel.
The Mommy Club S1-2
Dié realiteitsreeks het in ’n plaaslike fenomeen ontaard. Die reeks volg ’n groep glam momfluencers in Johannesburg soos hulle die uitdagings van ouerskap aanpak.
The Real Housewives of Durban S1-4
Dié weergawe van die franchise is die wat al die langste aan die gang is en sekerlik die meeste aftrek geniet. Die vierde seisoen was veral ’n dramatiese een met Sorisha Naidoo wat uiteindelik in trane by die reünie uitgeloop het.
The Real Housewives: Ultimate Girls Trip – South Africa
In dié spin-off is agt van die mees ikoniese housewives op ’n reis na Jamaika getrakteer.
Tracking Thabo Bester
Tracking Thabo Bester is ’n ondersoekende dokkie uit die IdeaCandy-stal, dieselfde vervaardigers wat onder meer Devilsdorp, Rosemary’s Hitlist, en Steinheist vervaardig het. Dié ware misdaaddokumentêr vertel oor hoe die moordenaar en verkragter, Thabo Bester, uit die tronk ontsnap het deur mense te laat dink hy is in sy tronksel in ’n brand dood. Maar nee, die man het, glo met die hulp van sy medebeskuldigde en lover, dr. Nandipha Magudumana, die gereg ’n rat voor die oë gedraai en daarna by die Woolies in Sandton City gaan shop.
Youngins S1-2
Dié tienerrreeks draai om ’n tiener wat ná ’n gesinstragedie na ’n kosskool in Jozi vlug, maar daar word sy by ’n woeste skandaal betrek.
