Erica Wessels, Jacques Bessenger, Beer Adriaanse, Cintaine Schutte, Roeline Daneel… van Suid-Afrika se bekendste teater-, film- en televisie-akteurs vorm deel van die rolverdeling van regisseur Jaco Bouwer se nuwe Afrikaanse dramareeks, Niggies.
Niggies is gegrond op ’n ware verhaal. Dit vertel oor die twee twaalfjarige niggies, Issie Fourie en Petro Nel, wat in 1966 in die rustige dorpie Odendaalsrus in die Vrystaat ontvoer en vermoor is. Issie se broer, André, sweer daarna om alles in die stryd te werp om die skuldige aan die pen te laat ry – ’n veldtog wat sowat 20 jaar sou neem.
Riëtte van der Wat skryf in haar resensie oor die reeks se toorkrag: “Elke skoot vertel ’n storie, of bevat ’n stukkie simboliek: twee skoolrokkies wat nooit gedra sal word nie, hang gestryk en reg vir die skooljaar wat die volgende dag sou begin; twee draad-tuinstoele, vrolik geverf, staan leeg voor die huis; twee lykies, onder wit lap, word van die moordtoneel af weggedra… Dis dalk teen hierdie tyd ’n cliché om dit te sê in resensies, maar Erica Wessels gee regtig hier ’n meesterklas in toneelspel.”
Niggies saai Dinsdae om 20:00 op kykNET en DStv Stream (kanaal 144) uit. Episodes sal ook ná uitsending op Catch Up beskikbaar wees.
Luister die podcast op Spotify, YouTube en ook DStv Stream.
Gaan ook saam met ons agter die skerms op die stel van Niggies.
