Lesers van die land se grootste gesinstydskrif, Huisgenoot, ken haar naam. Sy is die vrou wat vir meer as drie dekades vanuit die toetskombuis tot in die veld gewone bestanddele in watertand-lekkerte omtower. Carmen Niehaus het reeds altesaam sowat 25 kookboeke die lig laat sien. Boonop sal jy haar Huisgenoot Wenresepte in elke kombuis wat sy sout werd is, vind. Eg Afrikaans, eg Suid-Afrikaans – met alles van bokkoms tot biltong tussendeur.
Nou het Carmen ’n nuwe koers aan die Weskus – en op die kassie – in die kosreeks, Lekker & Goed, ingeslaan. Dié keer kook sy nie net voor die kameras nie. In dié program stel sy kykers ook aan van die land se mees geliefde en gewildste glanspersoonlikhede bekend.
Haar eerste gas is juis ’n voormalige kollega, Arina du Plessis, wat deesdae die redakteur van Landbou Boerekos is. Sy en Arina het 20 jaar gelede laas saam aan tafel gesit. Daar is diep gedeel en wonderlike stories wat herleef is. Om nie van die midde-Oosterse lamsboud te praat nie!
Van Carmen se ander gaste sluit onder andere Marciel Hopkins, Shari Kennedy, Candice Bester, Herman Lensing, Johnny Davids en Antoinette Kellerman in.
Om gesonder te eet, is een van Carmen se prioriteite en vorm deel van die reeks se aanslag. “Gesonder eet gaan allermins daaroor om jou te ontneem van die lekkerte van kos. Inteendeel, as mens bietjie minder soet en ryk kook, is dit asof jy fyner proe en die verskillende lae geure ontdek.”
Die reeks fokus ook daarop om kos in sy eenvoud te waardeer.
Volgens Carmen is Lekker & Goed veel meer as net ’n kookprogram. “Dit wys die besonderse mooi van die Weskus en saam met verskeie bekende persoonlikhede deel ons lekker onthoue van onvergeetlike ervaringe wat baie keer deur kos aangewakker word.”
Lekker & Goed word vanaf Donderdag, 2 Januarie 2025, op kykNET (DStv-kanaal 144 en DStv Stream) om 17:30 uitgesaai. Ook ná uitsending op DStv Catch Up beskikbaar.
