“Johnny is daai ou wat . . . die creative juices, die borrel net oral uit. Ek meen, die goed wat hy aanvang. Ja, dis mind-boggling wat hy alles eintlik alles doen – en dit met kos,” gesels Carmen in die laaste episode van kykNET se Lekker en goed oor vandeesweek se gas, Johnny Hamman. Kykers sal dié kosfoendi ook onthou as die kinkelkokwenner van Kokkedoor se tweede seisoen saam met sy spanmaat, onthoukok Elsa Buys.
Wat is in daai glasie?
Vandag word Johnny getrakteer op Carmen se Tequila Sunrise, gemaak met rooibos. Die rand van die glase word met sout en suurlemoen versier, en dan gooi ons maar ’n dubbeltjie. Hoekom dan nou nie?
’n Bietjie lemoensap, gevolg deur Carmién Tea se Cranberry Hibiscus wat tot ’n stropie gekook is, sorg vir daardie besondere sonsopkoms-kleure so eie aan hierdie drankie.
Die restaurant
So tussendeur vertel Johnny dat hy die afgelope sewe jaar in Wellington woon waar hy uit die moeilikheid probeer bly. Johnny vertel hy het sy restaurant daar oopgemaak vir R2,50 want daar was nie geld vir restaurante oopmaak nie. Gelukkig het hy baie toerusting en stoele en dinge gehad danksy sy spysenieringsbedryf.
Hy erken die diens is swak, maar dit gaan oor die gemeenskaplikheid van ’n bord kos geniet met die regte atmosfeer. En so nou en dan nooi hy sy “tweede ma”, Isabella Niehaus, self ’n legende in eie reg op die kosgebied, om daar te kom kook.
Op die spyskaart
Beesfillet in ’n rooiwyndoek op sout . . . maggies, dit klink mos lekker! Deur die reeks het kykers geleer dat Carmen boonop ’n soettand het. Vandag stel sy nie teleur nie. Daar’s Portugese tertjies om mee af te sluit.
Carmen erken ’n groot stuk vleis soos dié van vandag, kan nogal intimiderend wees. Daarom takel sy dit op ’n eenvoudige manier deur dit eers in botter te braai om die kleur reg te kry voordat dit oond toe gaan.
Johnny skrik vir niks. Hy is glad nie beïndruk daarmee dat mense duur oonde en kragopwekkers moet huur vir spysenieringsdoeleindes om vleis gaar te maak nie, terwyl daar met ’n barrel-braai (’n braai-drom, soms met ’n toeklap-deksel) tot 40 filette binne ’n halfuur gaargemaak word. Hy vertel hoe hulle Himalaja-soutblokke inspan en dit vooraf verhit op die kole verhit. Wanneer die filet gaar is, kry elke tafel ’n warm soutblok. “Dan kom die sjefs uit en dan slide jy die filet op die tafel – en dan sizzle dit soos nou soos by die Spur op ’n Hot Rock,” kom dit baie entoesiasties van Johnny.
Hoe werk die wyndoek?
Dis ’n gewone kombuisvadoek wat met rooiwyn klam gemaak word, nie deurweek word nie.
Carmen vertel vir Johnny dit was einste haar gas van die vorige episode, Herman Lensing, wat haar bewus gemaak het van hierdie metode. Dan volg ’n hêngse klomp sout op die wyndoek. En nóg pinotage . . . ’n hele bottel daarvan.
Pasteis de Nata
Die regte Portugese uitspraak van hierdie heerlike vlatertjie so eie aan daardie land, is ’n regte tongknoper vir Carmen. Johnny het moedig probeer om haar te help want hy was al verskeie kere in Portugal.
Tongknoper of te nie, Carmen het hierdie tertjie aangepas om dit meer Suid-Afrikaans te maak. Sy span rooibostee in en gebruik eerder filodeeg in plaas van pasteideeg.
Die tafel
Carmen verras vir Johnny deur te noem dat sy nog gaste genooi het om saam met hulle aan tafel te sit. Sy vertel sy het mense genooi wat dit vir haar moontlik gemaak het om haar eerste TV-reeks te kon doen.
En wat ’n lieflike manier om vir haar borge dankie te sê vir die afgelope 13 weke se saamkuier, saamkook, herinneringe op te roep en die gees van gesond, maar lékker eet te bevorder.
“Ek wil die bang uithaal vir mense wat te bang is om ander mense oor te nooi vir ’n ete. Of vir sommer net ’n lekker kuier, want op die ou einde gaan dit tog net oor samesyn. Jy’t vriende en familie nodig om jou batterye te herlaai,” sê Carmen en sy voel kos bring daai hele kaboedel bymekaar.
“Definitief stop dit nie hier vir Carmen nie,” sluit sy af.
Ons hou die spasie dop!
Al Lekker & Goed se resepte is op terloops beskikbaar.
Lekker & Goed se eerste seisoen op kykNET het pas sy laaste episode uitgesaai. Al die episodes van die eerste seisoen is egter nog tans op Catch Up/DStv Stream beskikbaar.
