Die 13de seisoen van Gerrie Pretorius se Leef jou reis neem weer vir kykers na prentjiemooi bestemmings. Die reeks word vanaf Aprilmaand weer op kykNET uitgesaai.
“Die program het sedert die eerste seisoen mense inspireer om die wêreld te verken” sê Gerrie luidens ’n mediaverklaring. “Die handelsnaam Leef Jou Reis speel ook ’n leidende rol in die toerismebedryf. Dis ’n gerespekteerde naam in die nasionale- én internasionele toerbedryf en ons span word gereeld deur ambassades en toerisme-owerhede genooi om gesprekke oor die toekoms en ontwikkeling van reis te lei. Leef Jou Reis neem mense ook op eksklusiewe toere na groot sportgeleenthede, soos die F1-wedren in Abu Dhabi, en ekspedisies na Antarktika.”
Seisoen 13 se hoogtepunte
Een van die hoogtepunte dié seisoen sluit ’n blik op Venesië se nooddienste in, met onder meer die stad se waterambulanse wat bekyk word. Natuurlik kom die inwoners se konstante uitdagings met die stygende en dalende watervlakke ook onder die loep.
In nog ’n hoogtepunt word daar in Turkye besoeke afgelê aan historiese karavaanherberge, die marmerstrate van Ephesus, die sewe kerke van Openbaring en die ikoniese sprokieslandskap van Kappadosië, bekend vir sy feetjietorings en ondergrondse stede.
Dan is daar ook besoeke aan Granada, Málaga en Marrakesj, asook ’n reis op Suid-Afrika se luukse Bloutrein en ’n soektog na versteekte aantreklikhede in Kaapstad.
Die nuwe seisoen van Leef jou reis begin op 5 April om 19:30 op kykNET en DStv Stream (DStv-kanaal 144). Episodes sal ook ná uitsending op Catch Up beskikbaar wees.
Die 11de seisoen van Leef jou reis is ook tans op Showmax beskikbaar om te stroom.
