Showmax het pas die eerste lokprent vir Eksie Perfeksie, wat op Vrydag, 9 Augustus 2024 op dié platform begin stroom, vrygestel.
Waaroor gaan dit?
Alhoewel hy haar skaars ken, maak André die impulsiewe besluit om by sy nuwe meisie in te trek, net om dan uit te vind dat Dalene steeds bevriend is met ál haar eks-kêrels. Geïntimideer deur hul teenwoordigheid, probeer André eers om met hulle bevriend te raak, maar dan ontdek hy dat al Dalene se verhoudings presies dieselfde patroon volg …
Pietie Beyers (Binnelanders, Die Onderonsie) en Emma van Heyn (2024 Silwerskerm-rolprent Gebokste Liefde, Matilda en Matthys, Twintig Tone in ‘n Hangkas) vertolk die hoofrolle, met die sanger Bobby van Jaarsveld (Liefling, Spoorloos) en voormalige Mnr. Wêreld Suid-Afrika, Sean van Noordwyk (Getroud Met Rugby, Die Onderonsie), as twee van Dalene se vele ekse.
Maude Sandham (Binnelanders) speel André se suster, met die Safta- en Silwerskermwenner Cindy Swanepoel (Koek) as haar girlfriend, terwyl Yvonne van den Bergh (7de Laan, Orion) as dié paartjies se dominatrix te sien is. Eksie Perfeksie is ook Yvonne se eerste keer terug op die skerm in byna ’n dekade.
Die Groot Ontbyt se Pierre Breytenbach is die verteller. Corné Koegelenberg (Valentynsokkie) het die storie, wat gegrond is op ’n storie deur sy lewensmaat, Safta-benoemde Bibi Slippers (Hotel, Matilda en Matthys), se draaiboek geskryf en ook die regie behartig.
Dinge raak persoonlik…
Kan jy vriende bly met jou ekse? Ja of nee? Dié verdelende vraag is die kern van Eksie Perfeksie. Vir Corné het dinge toe nogal persoonlik geraak tydens verfilming…
“Ek sê nie Showmax het my gedwing om Pietie in die rolverdeling te plaas nie, maar hy is Bibi se eks, so ek wou regtig nie hê sy moet ’n hele draaiboek skryf oor ’n vrou wat verlief raak op hom nie,” skerts Corné.
“En dan, nog meer irriterend, hy is só goed hierin. Ons het eintlik swemmaats en vriende geword wat sonder Bibi op middagete-afsprake gaan. So ek hou daarvan om te dink ek het dinge uiteindelik beter hanteer as wat André doen, maar ek was moontlik aanvanklik nie veel beter nie.”
Eksie Perfeksie bied nie ’n tipiese Hollywood-uitkyk op romanse nie.
“Dinge loop nie altyd reg nie,” sê Corné. “Soms is mense skaam. Soms vra hulle die verkeerde vrae. Soms doen hulle die verkeerde dinge. Ons wou veelvlakkige karakters skep met werklike, alledaagse probleme waarmee ons kykers kan vereenselwig.”
Uiteindelik wou hy ook net mense laat lag.
“Ons wou regtig ’n belaglike komedie maak,” sê Corné.
“Ek het die komedies van my kinderdae in gedagte gehou, wat ek seker nie veronderstel was om te kyk nie. Dinge soos There’s Something About Mary en American Pie uit die laat-90’s, waar daar baie onder-die-belt-grappies was. Ek onthou dat ek van daardie films saam met my ma gekyk het, en dit was vreemd. In Afrikaans maak ons gewoonlik nie sulke flieks nie, en as ons dit doen, gaan ons te ver. Ons wou dus probeer om ’n balans te skep tussen ’n goeie ou lekker liefdesverhaal en ‘n lawwe komedie wat jou sal laat cringe.”
Vanaf 9 Augustus 2024 op Showmax beskikbaar om te stroom.
