Klubhuis neem kykers op reis na die hartkamers van die plaaslike rugbywêreld; daar waar kameras selde – indien ooit – kom, waar grasvelde ’n luukse is en die waardes van rugby – spanwerk, dissipline, en respek – gemeenskappe op en veral van die veld af saamsnoer.
Die vervaardigers van Klubhuis het die land vol gereis agter klubrugbystories – van Saldanha tot Hawston, van Thabazimbi tot Vanwyksvlei. Dié reeks, bestaande uit ses episodes, is oor die loop van meer as ’n jaar verfilm.
Vir baie van die spelers is klubrugby ’n tuiskoms, ’n uitkoms, ’n droom om raakgesien te word en eendag ook op die groot velde van die land en die wêreld te speel. Soos op Hawston duskant Hermanus waar die voormalige Springbok Gio Aplon die goue seun is wat vir menige jong speler steeds ’n inspirasie is. Op Prins Albert predik Jason Jaftha, ’n voormalige beroepskeidsregter, rugby uit sy reëlboek en aan die skadukant van Johannesburg is die Raiders, ’n klub wat glo aan die ontginning van geleenthede én tweede kanse.
Vir watter klubs word daar geskree?
Die ses klubs en die datums waarop dit uitgesaai word is as volg:
- 13 Desember 2024 – Saldanha
- 20 Desember 2024 – Northam Rhinos
- 27 Desember 2024 – Prins Albert
- 3 Januarie 2025 – Vanwyksvlei
- 10 Januarie 2025 – Hawston
- 17 Januarie 2025 – Raiders
Klubhuis begin op 13 Desember om 20:00 op kykNET, DStv-kanaal 144, en sal ook op DStv Stream en Catch Up beskikbaar wees.
