Daar’s nog ’n nuwe, oorspronklike realiteitsreeks op pad na kykNET – en kykers het nou die geleentheid om vir Klein paradys in te skryf.
Klein paradys sal na verwagting later vanjaar uitgesaai word met die premis wat draai om ses spanne wat elk ’n mikro-woonstel opknap en stileer in ’n poging om R1 miljoen te wen.
Elke span bestaan uit twee lede met ’n bestaande verhouding – dus moet hulle mekaar reeds ken en vertrou. Dit sluit byvoorbeeld broers en susters, ’n ouer en ’n kind, vriende, kollegas, ’n liefdespaar, twee eks-verliefdes of kamermaats in – enige duo wat reeds goed met mekaar se ins and outs bekend is.
Die mikro-wonings wat vir die reeks omskep moet word, moet uiteindelik vyfster-status aan voornemende gaste bied. In Klein paradys gaan die spanne dus moet uithaal en wys om die mees indrukwekkende, mooiste en mees praktiese mikro-woning in te rig. Soos die gesegde lui: klein maar getrein.
So, as jy prakties en stylvol is en ’n klein ruimte kan omskep in ’n pragtige huis met elke moontlike gerief, gooi jou naam in die hoed en skryf in.
Die reeks sal in die Wes-Kaap verfilm word. Inskrywings open 1 Februarie 2024 en sluit op 29 Februarie 2024. Om jou span in te skryf, klik hier.Klein Paradys word deur Afrokaans vervaardig. Die reeks sal op kykNET (DStv-kanaal 144) in laat-2024 uitgesaai word. Dit sal ook op DStv Stream en DStv Catch Up beskikbaar wees.
