Op 28 November 1987, kort ná middernag, het die SAL Helderberg, ’n Boeing 747-244 B Combi, in die see aan die kus van Mauritius neergestort. Die vlug was van Taipei na Johannesburg onderweg voordat dit in vlamme uitgebars, in stukke opgebreek, neergestort, en die lewens van al 159 mense aan boord geëis het.
Nagenoeg vier dekades sedert dié tragedie stel die skeppers van die driedelige dokumentêre reeks, Helderberg, ondersoek na die oorsaak van die ongeluk in – ’n raaisel wat niemand nog met 100% sekerheid kon oplos nie. Die dokkiereeks se lokprent is vandeesweek vrygestel. Dit wys onder meer hoe owerhede na die vlugopnemers gesoek het, die internasionale ondersoek wat gevolg het, die meervuldige teorieë wat onder lugvaartkenners ontstaan het, en ’n beweerde bekentenis. Nog niks of niemand kon egter onmiskenlike antwoorde lewer nie.
Helderberg se drie episodes delf dieper na veral die agtergrondkonteks van die ramp en die tydstip waarin dit plaasgevind het.
Daar is onderhoude met kenners soos die forensiese wetenskaplike dr. David Klatzow, asook die joernalis Herman Jansen. Ook die burgerlugvaartowerheid se voormalige hoofondersoekbeampte, Rennie van Zyl, en die voormalige grootbaas van SAL, Gert van der Veer, lewer insigte. Daar word ook met eertydse Krygkor-werknemers, asook familie van die slagoffers, gepraat.
Helderberg se drie episodes saai vanaf Donderdag, 15 Mei 2025, om 20:00 op M-Net en DStv Stream (DStv-kanaal 144) uit. Episodes sal ook ná uitsending op Catch Up beskikbaar wees.
